İyulun 12-də Gəncə şəhərində keçirilən yas mərasimində baş verən hadisə ilə əlaqədar Azərbaycan Qida Təhlükəsizliyi Agentliyinin Gəncə-Daşkəsən regional bölməsinin əməkdaşları tərəfindən araşdırma aparılıb.
Bu barədə Oxu.Az-a agentlikdən məlumat verilib.
"İlkin məlumata görə, özlərini narahat hiss edən şəxslərə xəstəxanada müvafiq tibbi yardım göstərilib. Onlara dəqiqləşdirilməmiş bakterial qida zəhərlənməsi diaqnozu qoyulub. Həkim müayinəsindən sonra vəziyyətləri qənaətbəxş qiymətləndirilib və xəstələr evə buraxılıblar.
Hadisənin səbəblərinin müəyyənləşdirilməsi məqsədilə mərasimdə təqdim olunan, məişət şəraitində hazırlanan qida məhsullarından nümunələr götürülərək laborator müayinələrə təqdim edilib.
Araşdırmalar davam etdirilir", - deyə məlumatda qeyd olunub.
Bu gün Gəncədə baş verən kütləvi zəhərlənmənin təfərrüatı məlum olub.
Oxu.Az APA-ya istinadən xəbər verir ki, hadisə şəhərin Atatürk prospektində keçirilən yas mərasimində baş verib.
Yas yerində səkkiz nəfər yedikləri yeməkdən sonra özlərini pis hiss ediblər. Dərhal həmin şəxslər zəhərlənmə diaqnozu ilə Gəncə şəhərində yerləşən xəstəxanaların birinə yerləşdiriliblər. Onlara yardım edilib, hazırda vəziyyətlərinin normal olduğu bildirilir.
Məlumata görə, zəhərlənənlərin arasında azyaşlılar da var. Hadisə ilə bağlı araşdırma aparılır.
Eyni zamanda, Tibbi Ərazi Bölmələrini İdarəetmə Birliyi (TƏBİB) xəstəxanaya yerləşdirilənlərin vəziyyətini açıqlayıb.
Bildirilib ki, bu gün saat 18 radələrində Gəncə Şəhər Birləşmiş Xəstəxanasının nəzdində olan Abbas Səhhət adına xəstəxananın Yoluxucu xəstəliklər şöbəsinə 8 nəfər (3 kişi, 5 qadın) hospitalizasiya olunub:
"Onlara zəhərlənmə şübhəsi ilə zəruri tibbi xidmətlər göstərilib. Hazırda müvafiq şöbədə müalicələri davam etdirilir, vəziyyətləri stabil qiymətləndirilir".
Gəncədə qidadan kütləvi zəhərlənmə baş verib.
Oxu.Az "Qafqazinfo"ya istinadla xəbər verir ki, yeddi nəfər zəhərlənmə diaqnozu ilə xəstəxanalardan birinə yerləşdirilib.
Onlar arasında azyaşlılar da var.
Xəstəxanaya yerləşdirilən şəxslərin adları məlum olub: Nuriyyə Rüstəmova (1962), Amin Teymurlu (1986), İ.Məmmədov (2017), Z.Hüseynova (2015), U.İsayev (2020), Bənövşə Əliyeva (1963), Sevil Hüseynova (1987).
