Bakı-Şamaxı-Yevlax yolunda baş verən yol-nəqliyyat hadisəsi zamanı xəsarət alanların son vəziyyətləri açıqlanıb.
Oxu.Az-ın sorğusuna cavab olaraq Respublika Təcili və Təxirəsalınmaz Tibbi Yardım Mərkəzindən bildirilib ki, yanvarın 7-də, saat 08:30-da Respublika Təcili və Təxirəsalınmaz Tibbi Yardım Mərkəzinə Bakı-Şamaxı yolundan yol-nəqliyyat hadisəsinin baş verməsi səbəbi ilə çağırış qeydə alınıb.
"Çağırış ünvanına dərhal təcili tibbi yardım briqadası cəlb olunub. Hadisə yerində xəsarət alan dörd nəfərə (iki kişi, iki qadın) təcili tibbi yardım briqadası tərəfindən zəruri tibbi xidmət göstərilib və bədənin müxtəlif dərəcəli xəsarətləri ilə Şamaxı Rayon Mərkəzi Xəstəxanasına hospitalizasiya olunublar.
Onlara döş qəfəsinin əzilməsi, onurğanın bel şöbəsinin kapsul-bağ aparatının gərilməsi və zədələnməsi, aşıq-baldır oynağı və ayaq nahiyəsinin səthi travması, sirkə kasasının sınığı diaqnozları təyin olunub və zəruri tibbi xidmətlər göstərilib.
1957-ci il, 1981-ci il və 1985-ci il (2 qadın, 1 kişi) təvəllüdlü şəxslərin vəziyyəti qənaətbəxş qiymətləndirildiyi üçün ambulator müalicə üçün evə buraxılıblar.
Vəziyyəti orta ağır qiymətləndirilən 1957-ci il təvəllüdlü (kişi) pasiyentin müalicəsi təcili tibbi yardım şöbəsində davam etdirilir", - deyə məlumatda vurğulanır.
Əzizə İsmayılova
Bakı-Şamaxı-Yevlax yolunda yol-nəqliyyat hadisəsi baş verib.
Oxu.Az-ın məlumatına görə, hadisə bu gün saat 9 radələrində yolun 116-cı kilometrliyində qeydə alınıb. Azər Əliyevin idarə etdiyi "Tofaş" və Razim Əzizovun idarə etdiyi "Opel" markalı avtomobillər toqquşub. Nəticədə "Tofaş"ın sürücüsü və iki sərnişinin xəsarət aldığı bildirilir.
Faktla bağlı araşdırma aparılır.
Samir Əli
