"Araz-Naxçıvan" komandası sabahkı qarşılaşmada bütün gücünü ortaya qoyacaq.
Oxu.Az xəbər verir ki, bunu "Araz-Naxçıvan"ın baş məşqçisi Elmar Baxşıyev UEFA Konfrans Liqasının II təsnifat mərhələsində "Aris"ə qarşı keçirəcəkləri oyundan əvvəl mətbuat konfransında söyləyib.
"Sabahkı oyunun vacibliyini hər kəs dərk edir. Qarşılaşmaya ciddi hazırlaşmışıq. İnanıram ki, sabah futbolçularımız meydanda ən yaxşılarını göstərəcəklər. Təcrübəsiz kimi görünsək də, bütün gücümüzü meydanda qoyacağıq. Yaxşı futbolçulara malikik. Komandamız avrokuboklarda debüt etsə də, heyətdə Avropa turnirlərində çıxış etmiş oyunçular var. İnanırıq ki, həmin futbolçuların təcrübəsi sabahkı matçda bizə kömək edəcək. Elə bir zamandayıq ki, heç nəyi gizlətmək olmur. Rəqib komandanın oyunlarını izləyib, lazımı təhlili aparmışıq".
Qeyd edək ki, "Araz-Naxçıvan" - "Aris" qarşılaşması sabah saat 20:00-da "Dalğa Arena"da keçiriləcək.
Anar Həsənov
