Azərbaycanı Avropa arenasında təmsil edən "Sabah", "Qarabağ", "Neftçi" və "Zirə" klublarının növbəti mərhələdəki rəqibləri artıq bəllidir.
Oxu.Az-ın məlumatına görə, UEFA Çempionlar Liqasının birinci təsnifat mərhələsini müvəffəqiyyətlə arxada qoyan "Sabah" ikinci mərhələ çərçivəsində Finlandiyanın "KuPS" komandası ilə qüvvəsini sınayacaq.
Azarkeşlərin maraqla gözlədiyi "Sabah" - "KuPS" duelində ilk oyuna iyulun 21-də saat 20:00-da start veriləcək.
Turnirdə inamlı qələbə qazanaraq yoluna davam edən "Qarabağ" isə UEFA Avropa Liqasının ikinci təsnifat mərhələsində Bolqarıstanın ÇSKA (Sofiya) klubu ilə münasibətlərinə aydınlıq gətirəcək. Ağdam təmsilçisinin bu mərhələdə ilk matçı Bakıda iyulun 23-də saat 20:00-da baş tutacaq.
Avropanın digər nüfuzlu turniri olan UEFA Konfrans Liqasında yarışa ikinci təsnifat mərhələsindən qoşulan "Neftçi"nin rəqibi Belarusun "Dinamo" (Minsk) komandası olacaq. Paytaxt təmsilçisi iyulun 22-də saat 20:00-da Bakıda meydana çıxacaq. Digər təmsilçimiz "Zirə" isə Estoniyanın "Payde" klubu ilə üz-üzə gələcək. Klublar arasında ilk oyunun iyunun 23-də, rəqibin meydançasında Bakı vaxtı ilə saat 21:00-da başlayacağı məlumdur.
Xatırladaq ki, avrokubokların növbəti mərhələsinin püşkatma mərasimi iyulun 20-də baş tutacaq.
