UEFA Millətlər Liqasının növbəti turunda Azərbaycan millisini qəbul edəcək Lixtenşteyn yığması kapitanı Nikolas Haslerin xidmətindən məhrum olub.
Oxu.Az xəbər verir ki, bu barədə Lixtenşteyn Futbol Federasiyasının rəsmi saytı məlumat yayıb.
35 yaşlı yarımmüdafiəçi şənbə günü klubu "Vaduts"un "Sion"a 0:4 hesabı ilə uduzduğu matçda zədələnib. Bu səbəbdən o, milli komandanın düşərgəsinə qoşula bilməyəcək.
Baş məşqçi Konrad Fünfştük Haslerin əvəzinə Niderlandın AVV "Swift" klubunda çıxış edən 27 yaşlı Manuel Mikusu heyətə dəvət edib.
"Kapitan Nikolas Haslerin yoxluğu təbii ki, bizim üçün ağır itkidir. O, millinin əvəzolunmaz aparıcı futbolçularından biridir. Ona tezliklə sağalmasını arzulayırıq", - deyə Fünfştük bildirib.
Qeyd edək ki, Lixtenşteyn - Azərbaycan qarşılaşması noyabrın 13-də Vaduz şəhərindəki "Reynpark" stadionunda keçiriləcək. Görüş Bakı vaxtı ilə saat 23:45-də başlayacaq.
