2026-cı il futbol üzrə dünya çempionatının açılış oyununda Meksika və CAR (Cənubi Afrika Respublikası) yığmaları üz-üzə gəliblər. Qarşılaşma Mexikodakı "Asteka" stadionunda keçirilib. Matçın baş hakimi braziliyalı Vilton Sampayo olub.
Oyunda hesabı Meksika yığmasının hücumçusu Xulian Kinyones açıb. O, matçın 9-cu dəqiqəsində fərqlənib. CAR millisinin yarımmüdafiəçisi Yaya Sitxole son ümid foluna görə 49-cu dəqiqədə qırmızı vərəqə alaraq meydandan qovulub.
Meksika yığmasının hücumçusu Raul Ximenes 67-ci dəqiqədə komandasının üstünlüyünü artırıb. CAR millisinin hücumçusu Temba Zvane isə VAR baxışından sonra 84-cü dəqiqədə qırmızı vərəqə alıb. O, rəqib futbolçunun üzünə zərbə endirdiyinə görə meydandan kənarlaşdırılıb və komandasını doqquz nəfərlə qoyub.
Matçın 90+2-ci dəqiqəsində Meksika millisinin müdafiəçisi Sezar Montes də qırmızı vərəqə alıb. Beləliklə, qarşılaşma Meksikanın 2:0 hesablı qələbəsi ilə yekunlaşıb.
Meksika və CAR yığmaları A qrupunda mübarizə aparırlar. Bu qələbədən sonra Meksika üç xalla turnir cədvəlinin ilk pilləsinə yüksəlib. CAR isə xalsız qalaraq dördüncü sırada qərarlaşıb.
İyunun 12-də qrupun digər oyunu çərçivəsində Cənubi Koreya və Çexiya yığmaları qarşılaşacaqlar.
Meksika millisi ikinci turda iyunun 19-da Cənubi Koreya ilə, üçüncü turda isə iyunun 25-də Çexiya ilə üz-üzə gələcək. CAR yığması isə ikinci turda iyunun 18-də Çexiya, üçüncü turda isə iyunun 25-də Cənubi Koreya ilə qarşılaşacaq.
2026-cı il futbol üzrə dünya çempionatı iyunun 11-dən iyulun 19-dək ABŞ, Kanada və Meksikada keçirilir.
Hazırkı dünya çempionu Argentina yığmasıdır. Argentina millisi 2022-ci il dünya çempionatının finalında Fransa ilə qarşılaşıb. Oyunun əsas vaxtı 3:3 hesabı ilə başa çatsa da, penaltilər seriyasında argentinalılar 4:2 hesabı ilə qalib gələrək dünya çempionu olublar.
Milyonların səbirsizliklə gözlədiyi futbol üzrə dünya çempionatına start verildi.
Oxu.Az-ın məlumatına görə, sayca 23-cü dəfə təşkil olunan mundialın açılış qarşılaşmasında ev sahibi olan Meksika millisi Cənubi Afrika yığması ilə üz-üzə gəlir.
A qrupu çərçivəsində baş tutan oyun "Mexiko Siti" stadionunda keçirilir, matçın ədalət təmsilçisi braziliyalı hakim Vilton Sampayodır.
2026-cı il futbol üzrə dünya çempionatının açılış mərasimi keçirilir.
Oxu.Az xəbər verir ki, ABŞ, Kanada və Meksikanın birgə ev sahibliyi etdiyi mundialın açılış mərasimində təşkilatçı ölkələrin mədəniyyətini əks etdirən rəngarəng şou proqramları, musiqi nömrələri və xüsusi səhnə performansları nümayiş etdirilir. Stadionda möhtəşəm işıq və atəşfəşanlıq şousu təşkil olunub.
Açılış mərasiminin ardınca dünya çempionatının ilk oyunu keçiriləcək. Turnirdə ümumilikdə 48 milli komanda mübarizə aparacaq ki, bu da mundial tarixində rekord göstəricidir.
Qeyd edək ki, 2026-cı il dünya çempionatı tarixdə ilk dəfə üç ölkənin birgə təşkilatçılığı ilə keçirilir. Turnirin oyunları ABŞ, Kanada və Meksikanın müxtəlif şəhərlərində baş tutacaq.
Bu gün milyonların səbirsizliklə gözlədiyi futbol üzrə dünya çempionatına start verilir.
Oxu.Az-ın məlumatına görə, sayca 23-cü dəfə təşkil olunacaq mundialın açılış qarşılaşmasında ev sahibi olan Meksika millisi Cənubi Afrika yığması ilə üz-üzə gələcək.
A qrupu çərçivəsində baş tutacaq ilk mübarizə Bakı vaxtı ilə saat 23:00-da başlayacaq. "Mexiko Siti" stadionunda keçiriləcək bu matçın ədalət təmsilçisi braziliyalı hakim Vilton Sampayo olacaq.
Qrupun digər duelində isə Cənubi Koreya və Çexiya yığmaları güclərini sınayacaqlar. "Estadio Akron" arenasında oynanılacaq görüşə Bakı vaxtı ilə saat 06:00-da start veriləcək.
Dünya çempionatı
A qrupu
I tur
11 iyun
23:00. Meksika - Cənubi Afrika
"Mexiko Siti" stadionu
12 iyun
06:00. Cənubi Koreya - Çexiya
"Estadio Akron" stadionu
Qeyd edək ki, mundiala iyulun 19-da yekun vurulacaq.
