Haiti millisi Azərbaycanla yoldaşlıq görüşünə 15 yaşlı futbolçu gətirib

Azərbaycan millisi görüş üçün əsas heyətə dəvət olunan 15 yaşlı futbolçu Emerson Less Sumqayıtda adını tarixə yazdıracaq.

Oxu.Az xəbər verir ki, o, martın 22-də Azərbaycan yığması ilə yoldaşlıq görüşündə meydana çıxsa, ölkəsində yeni rekorda imza atacaq.

Belə ki, Emerson Sumqayıtdakı qarşılaşmada iştirak edərsə, 15 yaşında əsas millidə debüt etmiş olacaq. Bununla da Haiti millisinin ən gənc simasına çevriləcək. Yamaykada "Maunt Plezent Akademiyası"nda çıxış edən Less bununla bağlı təəssüratını bölüşüb.

Oyunçu həyəcanını gizlətməyib:

"15 yaşımda əsas milliyə çağırıldığım üçün çox həyəcanlıyam. Həqiqətən də xoşbəxtəm və ailəm çox qürurludur. Çıxış etdiyim Yamayka çempionatında fiziki cəhətdən güclü olan futbolçular var. Bu da mənim inkişafıma təkan verir. Qarşıdakı yoldaşlıq görüşünə də özümü hazır sayıram. Özümdən qat-qat böyüklərə qarşı çıxış etmək gücündə olduğumu düşünürəm".

Qeyd edək ki, martın 22-də Mehdi Hüseynzadə adına Sumqayıt şəhər stadionunda keçiriləcək Azərbaycan - Haiti oyunu saat 21:45-də başlayacaq.