Dünyaca məşhur futbol məşqçisi Joze Mourinyo Türkiyə dövlətinə qarşı Avropa İnsan Hüquqları Məhkəməsinə şikayət ərizəsi ünvanlayıb.
Oxu.Az xəbər verir ki, bu barədə Türkiyənin NTV telekanalı məlumat yayıb.
Məlumata görə, portuqaliyalı çalışdırıcı Türkiyə Futbol Federasiyasının (TFF) ona qarşı çıxardığı qərarların ədalətsiz olduğunu iddia edir.
Qeyd olunur ki, Mourinyo 2024-cü ildə "Fənərbağça"nın baş məşqçisi postunda olarkən "Trabzonspor"la oyundan sonra TFF-nin Nizam-İntizam Komitəsi tərəfindən cəzalandırılıb. Məşhur çalışdırıcıya soyunub-geyinmə otağına girmək qadağan edilib və yüz minlərlə türk lirəsi məbləğində cərimələnib. Onun çıxarılan qərardan verdiyi apellyasiya şikayəti isə təmin olunmayıb.
Türkiyə dövlətinin məsələ ilə bağlı mövqeyini bildirməsi üçün maksimum altı ay vaxtı var.
Qeyd edək ki, Mourinyo "Fənərbağça"nı 2024-cü ilin noyabrından ötən ilin avqustuna qədər çalışdırıb. Hazırda "Benfika"ya rəhbərlik edən məşhur məşqçinin karyerasını yenidən "Real Madrid"də davam etdirəcəyi gözlənilir.
