Milli komandalar səviyyəsində qol rekordçusu və beşqat "Qızıl top" sahibi, portuqaliyalı hücumçu Kriştianu Ronaldu futbol üzrə dünya çempionatlarında sonuncu matçına çıxıb.
Oxu.Az xəbər verir ki, 1/8 final mərhələsində baş tutan həmin görüşdə Portuqaliya yığması İspaniya millisinə 0:1 hesabı ilə məğlub olub.
Mundiallarda ümumilikdə 27 oyunda iştirak edən Ronaldu turnir tarixində bu göstəriciyə görə yalnız argentinalı hücumçu Lionel Messidən (30 oyun) geri qalaraq ikinci yerdə qərarlaşıb. Onun hesabında 11 qol var ki, onlardan yalnız biri pley-off mərhələsinə - DÇ-2026-nın 1/16 finalında Xorvatiya yığmasına qarşı keçirilən (2:1) görüşə təsadüf edir.
İspaniya millisinə qarşı oyundan əvvəl Ronaldu bu dünya çempionatının karyerasında sonuncu olduğunu açıqlamışdı. Onun turnirdəki ən yaxşı nəticəsi 2006-cı ildə qazandığı dördüncü yer olub.
Hazırda 41 yaşı olan Ronaldu beş dəfə Çempionlar Liqasının qalibi, Avropa çempionu və iki dəfə Millətlər Liqasının qalibi adını qazanıb. Avropa çempionatları, Çempionlar Liqası və klublararası dünya çempionatları tarixində ən çox qol vurma rekordları da məhz ona məxsusdur. 2022-ci ilin dekabrından Səudiyyə Ərəbistanının "Ən-Nəsr" klubunda çıxış edən hücumçu, karyerası ərzində Portuqaliyanın "Sportinq", İngiltərənin "Mançester Yunayted", İtaliyanın "Yuventus" və İspaniyanın "Real" komandalarının da formasını geyinib.
