İran Futbol Federasiyası dünya çempionatı zamanı milli komandanı qeyri-bərabər vəziyyətə salan səyahət məhdudiyyətləri ilə əlaqədar Beynəlxalq Futbol Federasiyasına (FIFA) rəsmi şikayət ünvanlamaq niyyətindədir.
Oxu.Az xəbər verir ki, bu barədə idman jurnalisti Ceyms Daker "X" sosial şəbəkəsindəki səhifəsində məlumat yayıb.
Məlumata görə, iyunun 21-də Belçika millisi ilə qarşılaşacaq İran yığmasının Los-Ancelesə gedişinə məhdudiyyət qoyulub. Belə ki, komandaya tələb etdiyi kimi matçdan iki gün öncə deyil, cəmi bir gün əvvəl şəhərə gəlməyə icazə verilib.
"İran Futbol Federasiyası hesab edir ki, bu cür məhdudiyyətlər iştirakçı komandalar üçün bərabər şəraitin təmin edilməsi prinsipinə ziddir və hazırlıq prosesinə mənfi təsir göstərə bilər", - deyə qurumun rəsmi bəyanatında vurğulanır.
Xatırladaq ki, dünya çempionatı ABŞ, Kanada və Meksikanın ev sahibliyi ilə keçirilir. Tarixdə ilk dəfə 48 komandanın iştirak etdiyi turnir iyulun 19-da başa çatacaq.
