Nikaraqua Prezidenti Daniel Orteqa müxalifətin hakimiyyətə gəlməsinin qarşısını almaq üçün ölkədə seçkinin keçirilməyəcəyini elan edib.
Oxu.Az xəbər verir ki, bu barədə "The Guardian" məlumat yayıb.
1979-cu ildə Somoza sülaləsinin uzunmüddətli diktaturasının süqutu ilə nəticələnən Sandinist İnqilabının 47-ci ildönümü tədbirində prezident bildirib ki, müxalifət partiyalarının hökuməti ələ keçirmək və hakimiyyəti zəbt etmək cəhdlərinin qarşısını almaq üçün burada heç bir seçki keçirilməyəcək.
2007-ci ildən bu vəzifəni tutan prezident bildirib ki, hakimiyyət Milli Assambleya və aidiyyəti institutlarla birlikdə qanunlar üzərində işləyəcək, "çünki bizə ölkəsinə xəyanət edən sui-qəsdçilərə və xainlərə qarşı divar, sədd yaradacaq qanunlar lazımdır".
Seçkinin növbəti il baş tutması planlaşdırılırdı. Bununla belə, Orteqa prosesin tamamilə ləğv olunacağı, yoxsa sadəcə müxalif siyasi qüvvələrin iştirakına məhdudiyyət qoyulacağı barədə ətraflı məlumat təqdim etməyib. Qeyd edək ki, analoji vəziyyət əvvəllər də müşahidə olunub. Belə ki, 2021-ci ildəki seçki kampaniyası ərəfəsində mövcud hakimiyyət rəqib partiyaların fəaliyyətini qadağan edərək müxalifət düşərgəsindən olan bütün prezidentliyə namizədləri həbsə atmışdı.
