"Hazırda komandalarımız ilk rəsmi oyunlarını keçirəcəklər. Bu səbəbdən dəqiq bir proqnoz vermək və ya hansısa bir fikir bildirmək düzgün olmaz".
Bunu Oxu.Az-a açıqlamasında "Səbail" klubunun sabiq baş məşqçisi Şahin Diniyev deyib.
"İndiki məqamda proqnoz vermək çox çətindir. Çünki klublarımız ilk rəsmi oyunlarına çıxacaqlar. Yoldaşlıq görüşləri rəsmi deyil və bu səbəbdən o nəticələrə diqqət yetirməməliyik. Komandalarımızın avrokuboklardakı ilk oyunlarından sonra baş məşqçilərin və futbolçuların yeni mövsümə hazırlıqları barədə nəsə demək olar. Hətta komandalar ən azı bir neçə oyun keçirməlidirlər ki, futbolçuların nəyə qadir olduqlarını bilək.
Hazırda klublarımıza yeni gələn futbolçular var. Bu səbəbdən ilk oyunlarda yetəri qədər səhvlər olacaq. Baş məşqçilər isə bu səhvlərdən dərs çıxararaq düzgün komanda formalaşdıra bilərlər. Düzdür, avrokuboklarda çıxış edən klublarımızın rəqibləri yetəri qədər güclüdürlər. Amma bu gün hər bir klubumuzun növbəti mərhələyə yüksəlmə şansı var. "Qarabağ" və "Sabah"ın şanslarını isə daha yüksək qiymətləndirərdim. Çünki "Qarabağ"ın avrokuboklarda qalması üçün üç, "Sabah"ın isə iki şansı var. Digər klublarımız avrokuboklarda qalmaq üçün yalnız bir şansa sahib olduqları üçün daha çox mübarizə aparmalı olacaqlar", - deyə Ş.Diniyev bildirib.
