Bu il sənaye istehsalı niyə azalıb?

"Dövlət Statistika Komitəsinin məlumatına əsasən, bu ilin ilk iki ayında Azərbaycanda 10 milyard 700 milyon manatlıq sənaye məhsulu istehsal olunub. Bu, əvvəlki ilin eyni dövrü ilə müqayisədə 1.9 faiz azalma deməkdir".

Oxu.Az xəbər verir ki, bunu iqtisadçı deputat Vüqar Bayramov sosial şəbəkə hesabında yazıb.

Onun sözlərinə görə, istehsalda azalmanın əsas səbəbi neft-qaz sektorunda hasilatın düşməsidir:

"Belə ki, bu ilin ilk iki ayında neft-qaz sektorunda sənaye istehsalı 3.2 faiz azalıb, qeyri-neft-qaz sektorunda isə 6.7 faiz artıb. Digər tərəfdən, həmin müddətdə əmtəəlik neft hasilatı 6.2 faiz azalıb, əmtəəlik qaz hasilatı isə 0.1 faiz artıb.

Sənaye məhsulunun 60.9 faizi mədənçıxarma, 31.8 faizi emal, 6.4 faizi elektrik enerjisi, qaz və buxar istehsalı, bölüşdürülməsi və təchizatı, 0.9 faizi isə su təchizatı, tullantıların təmizlənməsi və emalı sektorunda istehsal olunub. Sənayenin strukturunda mədənçıxarma sektorunun payı çox olduğu üçün neft-qaz istehsalının azalması ümumi sənaye məhsulunun həcmini də azaldıb.

2025-ci ilin ilk iki ayında sənayedə azalmanın qeydə alınmasına rəğmən, bu sektorda artımın sonrakı aylarda bərpa ediləcəyi gözlənir. Neft-qaz sənayesindəki azalma, həmçinin mövsümi faktorlarla bağlıdır. Bu baxımdan, 2025-ci il üçün sənayedə proqnozlaşdırılan artım tempinə illik yekunda nail olunacağı gözlənilir".