Sosial Tədqiqatlar Mərkəzi inzibati və texniki infrastrukturun kompleks istismarı, texniki dəstək və sanitar-logistika təminatı üzrə xidmətlərin satın alınması üçün tender elan edib.
Oxu.Az xəbər verir ki, dekabrın 23-də başa çatacaq satınalma müsabiqəsinin ehtimal olunan məbləği 204 min 170 manat 68 qəpik təşkil edir.
Texniki tapşırığa əsasən, 9 oturacaqlı mikroavtobusların salonu ildə iki dəfə kimyəvi vasitələrlə yuyulub dezinfeksiya edilməli və tam funksional vəziyyətdə təhvil verilməlidir. Yeddi oturacaqlı SUV avtomobillərinin salonu da ildə iki dəfə xüsusi vasitələrlə təmizlənib dezinfeksiya olunmalıdır. Sedan tipli avtomobillərin dəri oturacaqları ildə iki dəfə kimyəvi vasitələrlə yuyulmalı və dezinfeksiya edilməlidir.
Həmçinin, dəri üzlüklü divanlar ildə iki dəfə xüsusi vasitələrlə təmizlənib dezinfeksiya olunmalı, materialın bütövlüyü qorunmalıdır. Parça üzlüklü divanlar da ildə iki dəfə kimyəvi vasitələrlə yuyulub dezinfeksiya edilməlidir.
Ümumi sahəsi 1560 kvadratmetr olan fasad vitraj şüşələri il ərzində altı dəfə peşəkar mütəxəssislər tərəfindən yuyulub dezinfeksiya olunmalıdır.
