"2025-ci ilin aprel ayında Azərbaycan, Qazaxıstan və Özbəkistan ilə Anlaşma Memorandumu imzalanıb. Sənəd Yaşıl Enerji Dəhlizinin Mərkəzi Asiyanı da əhatə etməsi imkanını nəzərdə tutur. Bu layihə sayəsində Mərkəzi Asiyanın (xüsusilə külək və Günəş) bərpaolunan enerji resursları Azərbaycan üzərindən Avropa İttifaqının elektrik şəbəkəsinə qoşula bilər".
Oxu.Az xəbər verir ki, bu sözləri "Türk Dövlətləri Təşkilatı: Qlobal nizamsızlıq dövründə regional aktor kimi" adlı konfransda İqtisadi İslahatların Təhlili və Kommunikasiya Mərkəzinin Türk Dünyası Araşdırmalar Mərkəzinin rəhbəri Vüsalə Cəfərova deyib.
O, Azərbaycanın yaşıl enerji ambisiyalarından danışıb:
"2030-cu ilə qədər elektrik istehsalında 30% bərpaolunan enerji payı, 2050-ci ilə qədər elektrik istehsalında 40% bərpaolunan enerji payı nəzərdə tutulub. Məqsəd 1990-cı illə müqayisədə 2030-cu ilə qədər istixana qazı emissiyalarını 40% azaltmaqdır".
Mərahim Nəsib
