"Nepal və Çində baş verən faciələr bizə xatırladır ki, iqlim dəyişikliyi artıq sabah üçün xəbərdarlıq deyil. Milyonlarla insan üçün bu, günümüzün reallığıdır.
Ekstremal hava hadisələri təkcə ətraf mühitə deyil, iqtisadiyyatımıza, təhlükəsizliyimizə və inkişafımıza da təsir göstərir".
Oxu.Az xəbər verir ki, bunu Azərbaycanın xarici işlər nazirinin müavini Yalçın Rəfiyev BMT-nin İqlim Dəyişmələri üzrə Çərçivə Konvensiyasının Dördüncü İqlim Həftəsi (CW4) tədbirində çıxışı zamanı deyib.
O bildirib ki, iqlim dəyişikliyi yalnız dayanıqlılığımızı deyil, diplomatiyanın özünü də sınağa çəkir:
"Geosiyasi qarşıdurmaların, parçalanmanın və etimadın azalmasının hökm sürdüyü bir vaxtda iqlim dəyişikliyi bir ölkənin təkbaşına həll edə bilməyəcəyi problem olaraq qalır.
COP29-da əldə etdiyimiz təcrübə göstərdi ki, mövqelər barışmaz göründüyü zaman belə, diplomatiya nəticə əldə edə bilər.
Konsensus təxminən 200 tərəfin birdən-birə bütün məsələlər üzrə razılığa gəlməsi demək deyil. Konsensus müxtəlif milli reallıqların eyni istiqamətdə hərəkət etməsinə imkan verən ortaq məqamın tapılması deməkdir".
