Azərbaycanda universitetin korrupsiyaya görə həbs olunan şöbə müdirinə güzəşt olmadı - SON QƏRAR

Bakı Slavyan Universitetinin (BSU) korrupsiya cinayətlərində təqsirli bilinərək məhkum edilmiş şöbə müdiri Dürdanə Əliyevanın kassasiya şikayətinə baxılıb.

Oxu.Az "Qafqazinfo"ya istinadən xəbər verir ki, Ali Məhkəmə D.Əliyeva barəsində son qərarını açıqlayıb.

Məhkəmə xanım müttəhimin cinayətinə münasibətdə çıxarılmış əvvəlki qərarı qanunauyğun hesab edib. Bu əsasla hər hansı güzəşt tətbiq edilməyib.

Yekun qərarla Dürdanə Əliyeva barəsində altı il həbs cəzası qüvvədə saxlanılıb.

Qeyd edək ki, D.Əliyeva BSU-nun Əlavə və qiyabi təhsil şöbəsinin müdiri olduğu vaxtlarda mənimsəmə və rüşvət alma yolu ilə 226 min manat ələ keçirməkdə ittiham edilib. Amma o, tələbələrdən aldığı pulları rektor Nurlana Əliyevaya verdiyini deyib. Rektor məhkəmədəki ifadəsində ittihamı təkzib edib.