Bacısının qətlində təqsirləndirilən şəxs psixiatrik müalicəyə göndərildi

Paytaxtın Binəqədi rayonunda tələbə bacısını qətlə yetirməkdə təqsirləndirilən Həsən Kərimovun cinayət işi üzrə məhkəmə istintaqı yekunlaşıb.

Oxu.Az-ın məlumatına görə, Bakı Ağır Cinayətlər Məhkəməsinin hakimi Telman Hüseynovun sədrliyi ilə keçirilən sonuncu prosesdə dövlət ittihamçısı ittiham nitqi ilə çıxış edərək təqsirləndirilənin 16 il azadlıqdan məhrum olunmasını məhkəməyə təklif edib.

Müşavirədən qayıdan hakimlərin qərarı isə gözlənilməz olub. Məhkəmənin hökmü ilə Həsən Kərimov məcburi stasionar psixiatrik müalicəyə cəlb olunub.

Qeyd edək ki, məhkəmə istintaqı mərhələsində təqsirləndirilənin vəkilinin vəsatəti ilə Həsən Kərimov bir neçə dəfə psixiatrik ekspertizaya cəlb edilmişdi.

Xatırladaq ki, hadisə 2023-cü il oktyabrın 12-də saat 23 radələrində Binəqədi rayonunda qeydə alınıb. 2003-cü il təvəllüdlü İlahə Kərimovanın ölməsi barədə Binəqədi Rayon Prokurorluğuna məlumat daxil olub. Araşdırmalarla 2004-cü il təvəllüdlü Həsən Kərimovun Binəqədi rayonu, Sulutəpə qəsəbəsi ərazisində yerləşən fərdi yaşayış evlərindən birində aralarında yaranmış mübahisə zamanı bacısı İlahə Kərimovanı boğaraq qəsdən öldürməsinə əsaslı şübhələr müəyyən edilib. Faktla bağlı Binəqədi Rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılıb, Həsən Kərimov şübhəli şəxs qismində tutulub.

Onu da əlavə edək ki, İlahə Kərimova ADPU-nun nəzdində Azərbaycan Dövlət Pedaqoji Kollecinin tələbəsi olub. O, kollecin Peşə təlimi şöbəsində Geyimlərin modelləşdirilməsi və konstruksiya edilməsi ixtisası üzrə təhsil alıb.

Elgün Həsənli