Bakıda vəzifəyə təyin olunmaq üçün 40 min manat pul verən şəxs dələduzluqla üzləşib.
Oxu.Az "Qafqazinfo"ya istinadla xəbər verir ki, 1984-cü il təvəllüdlü Elşən Ağayev barəsində Cinayət Məcəlləsinin 178-ci (Dələduzluq) maddəsi ilə iş açılıb.
Məlum olub ki, Elşən tanışı S.Məmmədova onu Nazirlər Kabinetində işə düzəldəcəyinə dair yalan vəd verib aldadaraq, sonuncudan 2023-cü ilin yanvar-fevral aylarında Nərimanov rayonunda yerləşən "Margarita" restoranının qarşısında 40 min manat pul alıb. Lakin daha sonra Elşənin yalanı üzə çıxıb. Onun pulları dələduzluq yolu ilə ələ keçirməsi müəyyən edilib.
Bu səbəbdən S.Məmmədov polis əməkdaşlarına müraciət edib. O, Elşənə verdiyi pulun faizini də hesablayaraq 50 min manat tələb edib.
Cinayət işinin başlanmasından sonra Elşən həbs edilib. Onun barəsindəki cinayət işinin materialları Nərimanov Rayon Məhkəməsinə göndərilib. Məhkəmədə o, qarşı tərəfə vurduğu ziyanı tam ödəyib.
Məhkəmənin hökmü ilə Elşən Ağayevə 2 il 6 ay müddətə azadlığın məhdudlaşdırılması cəzası təyin edilib. Onun gecə saatlarında yaşadığı yeri tərk etməsi, ictimai tədbirlərə qatılması qadağan edilib və məhkəmə zalından sərbəst buraxılıb.
