Oleq Bakinskinin məhkəməsi - "Mən bakılıyam, Azərbaycan vətəndaşıyam, tərcüməçi lazım deyil"

Ukraynalı "kriminal avtoritet" Oleq Krapivinin ("Oleq Bakinski") və onunla birgə ittiham olunan Konstantin Kuçerin cinayət işi üzrə məhkəmə prosesi başlayıb.

Oxu.Az "Report"a istinadən xəbər verir ki, Bakı Ağır Cinayətlər Məhkəməsinin hakimi Elnur Muxtarovun sədrliyi ilə keçirilən prosesdə təqsirləndirilən şəxsin anket məlumatları dəqiqləşdirilib.

Cinayət işi üzrə Rusiya vətəndaşı Zaxarenkov Valeriy Nikolayeviç, "Aviazapçast" ASC və "Promışlennie Postavki Kazaxstan" MMC zərərçəkmiş qismində tanınıb.

Həmçinin Oleq Krapivinlə ("Oleq Bakinski") birgə ittiham olunan Konstantin Kuçerinlə bağlı bəzi məqamlar ortaya çıxıb.

Konstantin Kuçerin 2010-2011-ci ildə Ukraynanın sənaye siyasəti naziri müavini olub.

Konstantin Kuçerə Azərbaycan Cinayət Məcəlləsinin 178.4-cü (xüsusilə külli miqdarda dələduzluq) , 221-ci (xuliqanlıq) maddəsi ilə ittiham verilib.

İş üzrə Cinayət işi üzrə Rusiya vətəndaşı Zaxarenkov Valeriy Nikolayeviç, "Aviazapçast" ASC və "Promışlennie Postavki Kazaxstan" MMC zərərçəkmiş qismində tanınıb.

K.Kuçer Ukrayna sənaye siyasəti nazirinin müavini - Müdafiə Sənayesi Kompleksi üzrə Agentliyin rəhbəri (2010-2011), Ukrayna sənaye siyasəti nazirinin müavini (2006-2007) olub.

Məhkəmədə Oleq Krapivin tərcüməçiyə ehtiyac olmadığını və Azərbaycan dilini sərbəst bildiyini deyib:

"Mən bakılıyam, Azərbaycan vətəndaşıyam, tərcüməçi lazım deyil".

Hakim bildirib ki, anket məlumatlarında Oleq Krapivin 1960-cı ildə Şamaxıda anadan olduğunu və Bakıda Sabunçu qəsəbəsində yaşadığını deyib.

Digər təqsirləndirilən Konstantin Kuçerin hazırda rus dili tərcüməçisi ilə təmin olunub. Lakin o, növbəti prosesində tərcüməçinin Ukrayna dilini bilən şəxsin olmasını xahiş edib.

Anket məlumatları dəqiqləşdirilən zaman Konstantin Kuçerinin 8 övladı olduğu məlum olub. Təqsirləndirilən şəxslər məhkəmədə jurnalistlərin çəkiliş aparılmaması ilə bağlı vəsatət veriblər.

Məhkəmə hazırkı müddətdə vəsatəti təmin edib və prosesdə çəkiliş aparılmasına icazə verilməyib.

Konstantin Kuçerinin vəkili vəsatətlə çıxış edib. O bildirib ki, təqsirləndirilən şəxs Ukraynada nazir müavini olub, 2020-ci ildən Azərbaycana köçüb:

"Buranı özü üçün ikinci vətən kimi qəbul edib. Şirkətlər açıb, işçiləri olub. Bu adam heç kimə qarşı dələduzluq etməyib. Zərərçəkmiş kimi tanınan Rusiya şirkətləri ABŞ tərəfindən sanksiyaya məruz qalıb. Dələduzluq ittihamından əlavə müvəkkilimə xuliqanlıq maddəsi ilə də ittiham verilib. Mən xahiş edirəm ki, cinayət işi ilə bağlı zərərçəkmişin bioloji ekspertizası keçirilsin, cinayət işi ibtidai istintaqa qaytarılsın".

Oleq Krapivinin vəkili də çıxış edərək cinayət işinin ayrıca icraata verilməsini, müvəkkilinin iş üzrə tək mühakimə olunmasını xahiş edib:

"Müvəkkilim özünü təqsirli bilmir. Zərərçəkmişlər Rusiya vətəndaşıdır. Hər hansı bir təhlükə yoxdur. Oleq Krapivinin əməli az ağır cinayətlər kateqoriyasına aiddir. Bu səbəbdən xahiş edirik cinayət işi ayrıca icraata götürülsün və müvəkkilim barəsində ev dustaqlığı qətimkan tədbiri seçilsin".

"Oleq Bakinski" vəkilin fikirləri ilə razı olduğunu, zərərçəkmiş şəxsi vurmadığını və hər hansı bir xəsarət yetirmədiyini bildirib.

Zərərçəkmişin şəxsin hüquqi nümayəndəsi isə çıxış edərək təqsirləndirilən şəxslərin vəkillərinin verdiyi vəsatətin təmin olunmamasını xahiş edib:

"Konstantin Kuçerin başqa cinayətləri də olub. İspaniya onu qaçaqmalçılıqla bağlı İnterpol xətti ilə beynəlxalq axtarışa verib".

Konstantin Kuçerin isə buna etiraz edib və barəsində hər hansı bir axtarış olmadığını bildirib.

Məhkəmə vəsatətləri təmin etməyib. İş üzrə məhkəmə baxışı yanvarın 24-ə təyin edilib.

Xatırladaq ki, Oleq Krapivinə Cinayət Məcəlləsinin 221-ci (xuliqanlıq), digər təqsirləndirilən şəxsə isə 178.4-cü (dələduzluq - xüsusilə külli miqdarda ziyan vurmaqla törədildikdə) maddəsi ilə də ittiham verilib.

Qeyd edək ki, "Oleq Bakinski" DİN Mütəşəkkil Cinayətkarlığa Qarşı Baş İdarəsi tərəfindən Bakıda həbs edilib. İdarənin təqdimatı əsasında onun barəsində üçaylıq həbs qətimkan tədbiri seçilib.