"Qarabağ xronikası"nın budəfəki buraxılışında 27 sentyabr 2020-ci ildə başlayan 44 günlük müharibəyə gətirib çıxaran siyasi və hərbi proseslər, eləcə də döyüşlərin ilk günündə Murovdağ istiqamətində əldə olunan nəticələr təhlil olunub.
Bildirilib ki, 2018-ci ildən sonra Ermənistanın Qarabağ məsələsində mövqeyi sərtləşib. Danışıqlar prosesi davam etsə də, separatçı qurumun danışıqlarda ayrıca iştirak etməsi tələbi, "Miatsum" və "Artsax Ermənistandır" kimi siyasi şüarlar, həmçinin hərbi ritorikanın güclənməsi prosesə təsir edən əsas amillərdən olub.
Qeyd olunub ki, 2020-ci ilin iyulunda Tovuz döyüşlərindən sonra hərbi-siyasi gərginlik daha da artıb. Sentyabrın son günlərində tərəflərin qarşılıqlı ittihamları və hərbi hazırlıqla bağlı açıqlamaları fonunda sentyabrın 27-də genişmiqyaslı döyüşlər başlayıb.
Həmin gün Azərbaycan Ordusu Füzuli-Cəbrayıl istiqamətində bir sıra yaşayış məntəqələrini, şimal istiqamətində isə Murovdağ silsiləsində mühüm yüksəklik və keçidləri nəzarətə götürüb. Murov, Camışdağ və Ömər aşırımının ələ keçirilməsi müşahidə, logistika və manevr imkanları baxımından əhəmiyyətli nəticə yaradıb.
Beləliklə, 27 sentyabr illərlə davam edən nəticəsiz danışıqlardan, dəyişməyən status-kvodan və artan hərbi-siyasi gərginlikdən sonra yeni mərhələnin başlanğıcı olub. Qarşıda isə 44 günlük müharibənin ağır döyüşləri və Cəbrayıl, Füzuli, Zəngilan, Qubadlı və Şuşanın azad olunması ilə nəticələnən proses vardı.
