"ICESCO və UNESCO üçün ortaq prioritet istiqamətlərdən biri də təhlükə altında olan irsin qorunmasıdır".
Oxu.Az xəbər verir ki, bunu ICESCO-nun tərəfdaşlıqlar və beynəlxalq əməkdaşlıq sektorunun müdiri Anar Kərimov Bakıda keçirilən Dünya Şəhərsalma Forumu (WUF13) çərçivəsində təşkil olunan "Davamlı və ilhamverici mədəni dirçəliş - Təhlükəsizlik modeli" adlı tədbirdə deyib.
O bildirib ki, 2024-cü ildə ICESCO bu cür obyektlərin dünyadakı vəziyyətinin təhlilinə yönələn genişmiqyaslı araşdırmaya başlayıb:
"Araşdırmanın nəticələri narahatedici olub. Belə ki, təhlükə altında olan 56 dünya irsi obyektindən 33-ü İslam dünyası ölkələrinin payına düşür ki, bu da təxminən 60 faiz təşkil edir. Üstəlik, bu göstərici artmaqda davam edir".
"Bu məlumatlar bütün tərəflər üçün ciddi siqnaldır və irsin daha çox itirilməsinin qarşısını almaq, eləcə də təhlükə altında olan obyektlərin sayını azaltmaq məqsədilə ICESCO-nun üzv dövlətlərlə birlikdə daha fəal və sistemli addımlar atmasının vacibliyini göstərir", - ISESCO rəsmisi deyib.
