"Azərbaycanda imzalanmış sazişlər misilsiz əhəmiyyət kəsb edir, bu razılaşmaların hamısı ölkəmizin iqtisadi inkişafı, enerji təhlükəsizliyi və tranzit funksiyamızın gücləndirilməsi üçün fundamental önəmə malikdir".
Oxu.Az "Imedi News"a istinadən xəbər verir ki, bunu Gürcüstanın Baş naziri İrakli Kobaxidze deyib.
Hökumət başçısı Azərbaycan tərəfinə təşəkkürünü bildirərək qeyd edib ki, bu, iki hökumət arasında keçirilən standart danışıqlar deyil, daha çox dostların dialoqu olub:
"Reallıqda nəticələr göstərir ki, ölkəmizin Orta Dəhlizdəki rolu durmadan artır, bütövlükdə Orta Dəhlizin rolu da yüksəlir. 2020-ci ildən bəri Orta Dəhliz vasitəsilə yükdaşımaların həcmi yeddi dəfə artıb. Əlbəttə ki, biz bu üstünlükdən maksimum istifadə etməliyik və edirik də. Bu baxımdan Azərbaycanda imzaladığımız sazişlər misilsiz əhəmiyyətə və miqyasa malikdir. Sazişlər müxtəlif istiqamətlər üzrə imzalanıb və onların hamısı bizim tranzit funksiyamızın inkişafı ilə bağlıdır. Bu, qazın idxalı və tranzitinə aiddir ki, burada çox faydalı, son dərəcə səmərəli sazişlər imzalandı. Ən əsası, biz uyğun qiymətlər və müvafiq həcmlər əldə etdik ki, bu da ölkəmizin enerji təhlükəsizliyi üçün son dərəcə vacibdir. Buna görə Azərbaycan tərəfinə təşəkkür etməliyik"
Baş nazir strateji infrastruktur layihələri ilə bağlı xüsusi detalları da açıqlayıb:
"Qazın idxalı və tranzitinə gəlincə, söhbət elektrik enerjisinin idxalı və tranzitindən, həmçinin son üç ildir fəaliyyəti dayandırılmış Bakı-Tbilisi-Supsa neft kəmərindən gedir. Ölkə bu səbəbdən ildə onmilyonlarla lari potensial gəlir itirirdi və artıq bu boru kəmərinin fəaliyyəti bərpa olunacaq, burada da bizim üçün ən yaxşı şərtlər təmin edilib. Dəmir yoluna gəlincə, ayın sonundan etibarən Bakı-Tbilisi-Qars dəmir yolu tam xətt olaraq istifadəyə veriləcək və eyni zamanda Gürcüstanla Azərbaycan arasında sərnişin dəmir yolu əlaqəsi bərpa olunacaq. Bütün bu sazişlər ölkəmizin iqtisadi cəhətdən güclənməsi, enerji təhlükəsizliyi və tranzit funksiyamızın möhkəmlənməsi üçün əsaslı əhəmiyyət kəsb edir".
