Yetkinlik yaşına çatmayan məhkumların sayı AÇIQLANDI

“Ədliyyə Nazirliyinin Penitensiar Xidmətin Tərbiyə Müəssisəsində hazırda yetkinlik yaşına çatmayan 30 nəfər islah olunur”.

Oxu.Az xəbər verir ki, bu fikirləri jurnalistlərə açıqlamasında Ailə, Qadın və Uşaq Problemləri üzrə Dövlət Komitəsinin uşaq problemləri şöbəsinin müdiri Cəmilə Bağırova deyib.

O bildirib ki, hazırda cəzaçəkmə müəssisəsində olan məhkumlar 14-18 yaş aralığında olan yeniyetmələrdir:

“Yeniyetmələrin törətdiyi cinayətlər müxtəlifdir. Narkomaniya, oğurluq, dələduzluq, xuliqanlıq, sağlamlığa qəsdən zərərvurma, qəsdən adamöldürmə kimi cinayətlərdən cəza çəkənlər var.

Hazırda burada cəza çəkən yeniyetmələrdən cəzası ən çox olanı 10 ildir. O, söyüş üstündə adam öldürdüyünə görə məhkum olunub. 18 yaşa qədər cəza müddəti bitənlər buradan azadlığa çıxırlar, kimlərinsə cəza müddəti qalırsa, onlar böyüklər üçün cəzaçəkmə müəssisələrinə göndərilirlər”.

“Bu ilki əfv sərəncamı ilə 3-4 nəfərin cəza müddəti 3-6 ay azaldılıb, birbaşa azadlığa çıxanlar olmayıb. Eyni zamanda üç yeniyetmə məhkumun nümunəvi davranışlarına görə 20 yaşa qədər qanunvericilik çərçivəsində bu müəssisədə qalmağına icazə verilib. Həmin yaşa qədər onların cəza müddəti də bitmiş olacaq. Bu il artıq iki nəfərin cəzası bitib və azadlığa buraxılıb. 

Eləcə də məhkumların təhsil almaları üçün hər cür imkan da yaradılıb. Təhsil Nazirliyinin təyin etdiyi direktor və müəllimlər uşaqlara dərs keçir. Təhsil Nazirliyinin 45 saylı axşam tam orta məktəbi və peşə məktəbi burada fəaliyyət göstərir. Kim istəsə orada peşə ixtisası öyrənə bilər. Məktəb isə məcburidir”,- deyə Cəmilə Bağırova qeyd edib .

Könül Cəfərli