07 dekabr, 2022 / 17:48 7869

Qadın kilsədən pulla aldığı kişini döyərək diləndirir: “Ölsə, birini də gətirəcəyəm” - YENİLƏNİB + FOTO

Daxili İşlər Nazirliyi Bakı şəhərində qadının yaşlı kişini diləndirməsi ilə bağlı məsələyə münasibət bildirib.

DİN-in Mətbuat Xidmətinin əməkdaşı, polis leytenantı İbrahim Əmiraslanlı Oxu.Az-ın sorğusuna cavab olaraq bildirib ki, həmin şəxslər hazırda Sabunçu rayonunda yaşayan ər və arvad Leonid Konstantinoviç Soçnev və Zoya Həşimova Viktorovnadır:

“Polis əməkdaşları onları dəfələrlə avaralıq və dilənçiliklə məşğul olduqları üçün xəbərdarlıq edərək ərazidən uzaqlaşdırıblar. Bu gün də onların həmin ərazidə dilənçiliklə məşğul olmaları aşkar edilib və barələrində İnzibati Xətalar Məcəlləsinin 523-cü (Avaralıqla məşğul olma) maddəsi ilə protokol tərtib edilib. Polis əməkdaşları onları yaşadıqları ünvana aparıblar”.

Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyinin İctimaiyyətlə Əlaqələr Şöbəsinin müdiri Murad Həşimov isə Oxu.Az-ın sorğusuna cavab olaraq bildirib ki, agentliyin əməkdaşları sözügedən şəxsin vəziyyəti ilə bağlı əraziyə baxış keçiriblər:

“Təəssüf ki, həmin şəxs deyilən ərazidə olmayıb. Məsələ diqqətimizdədir”.

12:06

Bakı şəhərində qadın yaşlı kişini diləndirir.

Oxu.Az-ın əməkdaşları Xətai rayonu, Əhmədli qəsəbəsində yerləşən marketlərdən birinin qarşısında qocanın diləndirilməsinin şahidi olublar.

Yaxınlıqda yaşayan və çalışan sakinlər əməkdaşlarımıza bildiriblər ki, kişi illərdir Zoya Balabanova adlı qadın tərəfindən hər gün döyülərək səhər saat 10:00-dan axşam 21-22:00-dək ərazidə diləndirilir.

İddia ediblər ki, Z.Balabanova hər gün iki-üç saatdan bir kişinin insanlardan yığdığı pulları mənimsəyir.

Biz də buz kimi soyuq havada diləndirilən kişinin fotolarını çəkdik və qadının əraziyə yaxınlaşmasını gözlədik.

Elə bu zaman əraziyə Daxili İşlər Nazirliyinin Post Patrul Xidmətinin əməkdaşları yaxınlaşdılar. Onlar maşından belə, düşmədən bizdən:

“Niyə anlaqsız şəxsin şəklini çəkirsiniz?” - deyə soruşdular. Səbəbini izah etdik. Onlara niyə ərazidə illərdir bu cür halın baş verdiyi halda müdaxiləyə səy göstərmədiklərini soruşduq. Polislər isə ərazini tərk etdilər.

Ərazidə çalışan Ziyafət adlı şəxs iddia edir ki, qadın yaşlı kişini kilsədən pulla alıb:

“On ilə yaxındır, kişi burada diləndirilir. Hər gün səhər saatlarından gecə 21-22 radələrinə kimi burada qalır. Artıq kişi çox yaşlanıb, onu buraya ağacla döyə-döyə gətirir. Qadın yaşlı kişiyə zülm verir, dövlət qurumları isə məsələyə müdaxilə etmir. Həmin ağacı qadın mağazanın içindəki dəmir borunun altında saxlayır”.

O qeyd edib ki, qoca hər gün dilənməklə 50-60 manat pul yığır:

“Bizim millət rəhmlidir və əksəriyyət qocaya pul verir. Qadın hər gün müəyyən saatlarda gəlib pulları aparır. Biz qadına yaşlı kişiyə belə zülm etməsini irad tutduqda isə: “Öz işimdir”, - deyir. Hətta biz ona dedik ki, bu qədər döyülməklə, saatlarla soyuqda qalmaqla bu kişi öləcək.

Zoya isə dedi ki, bu öləcək, evdə biri də var, onu gətirəcəyəm. Polis gəldi, bir neçə dəfə bunları ərazidən qovdu, amma qadın yenə də kişini hər gün döyə-döyə gətirir. Qocanı, bir ağacı var, onunla döyür”.

İki saatdan çox vaxt keçdikdən sonra Zoya adlı qadın əraziyə yaxınlaşdı və kişinin yığdığı pulları mənimsədi. Bizə, sadəcə, fotoları silməyimizi hökm elədi.

Biz isə ümid edirik ki, dövlət qurumları qadının kişini diləndirməsi ilə bağlı tədbirlər görəcək və onun isti yerə aparılaraq yerləşdirilməsi təmin olunacaq...