Qərbi Azərbaycan Xronikası layihəsi çərçivəsində sənətşünaslıq üzrə fəlsəfə doktoru Elçin Əlibəylinin təqdimatında "İrsimiz" rubrikasının növbəti buraxılışı hazırlanıb.
Oxu.Az xəbər verir ki, "Göyçə gülü" havasının sirli məqamları" adlı buraxılışda filologiya üzrə fəlsəfə doktoru, dosent İlhamə Qəsəbova Qərbi Azərbaycanda aşıq sənətindən söz açıb.
O bildirib ki, Qərbi Azərbaycan aşıq mühitinin xüsusi özəlliyi var: "Göyçə aşıq sənəti batan aşıq mühitlərinə təsir edib. Aşıq öz ustadının irsini daşıyıb ötürür. Toyda bütün gecəni dastan danışırdılar".
Onun sözlərinə görə, Qərbi azərbaycanlılar dil içində dil, din içində din yaşadıb.
İ.Qəsəbova ustadın qarşısında imtahandan çıxmaq üçün əsas şərtdən, ictimai-siyasi proseslərə aşıq yanaşmasından söz açıb, yazmağı bacarmayan Aşıq Ələsgərin şeirləri hansı yolla yadda saxlamasına, eləcə də "Göyçə gülü" havasının sirli məqamlarına aydınlıq gətirib.
Xatırladaq ki, Qərbi Azərbaycan Xronikası layihəsinin məqsədi tarixi torpaqlarımızın adının yaşadılması, tanıdılması, həmçinin azərbaycanlıların ermənilər tərəfindən deportasiyaya məruz qoyulmasından, həmin ərazilərdə mövcud olmuş, lakin adı silinən toponimlərin, saysız-hesabsız yeraltı və yerüstü maddi mədəniyyət nümunələri - qədim yaşayış məskənləri, nekropollar, kurqanlar, qala, saray və istehkam qalıqları, karvansaralar, körpülər, qəbirüstü sənduqələr, xaçdaşlar, at-qoç heykəlləri, məbəd, kilsə, məscid, pir və ocaqların üzə çıxarılması, həmin ərazinin təmiz oğuz-türk məskənləri olduğunu təsdiq edən faktların dünya ictimaiyyətinə çatdırılmasıdır.
Həmçinin Prezident İlham Əliyevin Qərbi Azərbaycanla bağlı dediyi "XX əsrin əvvəllərinə təsadüf edən xəritə bir daha onu göstərir ki, Qərbi Azərbaycan tarixi Azərbaycan diyarıdır, şəhərlərin, kəndlərin adları Azərbaycan mənşəlidir və biz yaxşı bilirik ki, indiki Ermənistan ərazisində tarix boyu Azərbaycan xalqı yaşayıb. İndi əsas vəzifə ondan ibarətdir ki, dünya ictimaiyyəti də bunu bilsin", - fikrini əsas tutaraq, Qərbi Azərbaycan İcmasının hazırladığı Qayıdış Konsepsiyasından irəli gələn vəzifələrin təbliğidir.
Bundan əlavə, Qərbi Azərbaycanla bağlı tarixçilərin, araşdırmaçıların düşüncələrini, deportasiyaya məruz qalmış şəxslərin həyat hekayəsini işıqlandırmaqdır.
