“Active Mom’s Club” yeni mövsümə başladı - FOTO

Sentyabr ayının axırıncı şənbəsində “Active Mom’s Club”  üzvü olan analar ilk dəfə olaraq şəhərdən kənarda, Qala kəndində milli çalarların ahəngində, ənənəvi işgüzar səhər yeməyi ətrafında görüşdülər.  Bununla da analar cəmiyyəti yeni mövsümə möhtəşəm şəkildə başladılar. İttifaq tərəfdaşlarla birlikdə ləziz səhər yeməyini, xoş söhbəti, canlı musiqini, maraqlı qonaqların çıxışlarını özündə ehtiva edən proqram hazırlayaraq, analara təqdim etdilər. Görüşün sonunda xanımlar üçün kiçik hədiyyələr də təşkil edilmişdi. İttifaq anaların bayramlara layiq olduğunu nəzərə alaraq, mövsümün açılışını və bağlanışını təntənəli şəkildə keçirməyi adət halına çevirmək niyyətindədir.

Oxu.Az xəbər verir ki, ənənəvi səhər yeməyinin mövzusu qadınların uğuru haqqında  - “İşi, ailəni, övladların təbiyəsini necə birləşdirək, vaxtı necə düzgün təşkil edək?” -  idi. Öz təcrübəsini analarımızla bölüşən mütəxəssis bu dəfə BP-nin Azərbaycan, Gürcüstan, Türkiyə regionları üzrə İnsan resursları vitse-prezidenti Leyla Novruzova oldu.

Qeyd edək ki, “Active Mom’s  Club” qonaqları “analara yaşamağı öyrətmək” üçün gəlmir. Onlarla yaşadıqları təcrübələri bölüşərək, necə idarəçi- ana olduqlarından bəhs edirlər. Leyla Novruzova qeyd etdi ki, ananın gücü onun hərtərəfli olmasındadır. Onlar uşağın tərbiyəsi, evin idarəsi və şəxsi həyatını uyğunlaşdıra bilir. Leyla Novruzova ağır yüklərə baxmayaraq, ailə ocağının, qəyyumluq rolunun öhdəsindən yaxşı gəlməyi bacaran, qayğıkeş ana və karyera nərdivanında yüksələn müasir qadının həyat prioritetlərinə toxundu.

Qeyd edək ki, hər ayın sonuncu şənbə günü “Active Mom’s Club” analar üçün maraqlı mövzuların müzakirə olunduğu, mürəkkəb sualların cavablandırıldığı faydalı səhər yeməklərini təşkil edir. Bu ənənə gələcəkdə də davam edəcək.

İttifaq ötən mövsümdən, hər ay müxtəlif yaş kateqoriyalarında olan analara istiqamətlənmiş faydalı səhər yeməklərini və görüşləri təşkil edir. Bu ənənəvi səhər yeməklərinin faydası nədir? Bu görüşlər analara imkan yaradır ki, işlərdən bir az uzaqlaşıb, özlərinə zaman ayırıb, müəyyən məsələlərdə çıxış yolları tapsınlar. Bəzi görüşlərdəki kiçik tanışlıqlar böyük dostluqlara belə çevrilib. Səhər yeməyində və digər görüşlərdə çıxış edən maraqlı natiqlər həyat təcrübələrini bölüşməklə yanaşı, faydalı məsləhətlər də verirlər.  

 A.S.
www.oxu.az