"Çox istərdik ki, Bakı və ölkənin digər şəhərləri yağışlara hazır olsun. Təəssüflər olsun ki, son illər biz bunun əksini görürük".
Bunu Oxu.Az-a açıqlamasında Milli Məclisin Əmək və sosial siyasət komitəsinin sədr müavini, deputat Elşad Musayev deyib.
O bildirib ki, yağış və qar yağan kimi, Bakı şəhərinin müvafiq mövsümə hazırlıqsız olması üzə çıxır:
"Düşünürəm ki, müvafiq strukturların kifayət qədər zamanı var idi ki, bu problemlərin öhdəsindən gəlsinlər. Qışa hazır olmaq üçün kanalizasiya xətlərinin çəkilməsi, təmir-tikinti işləri və digər tədbirlər vaxtında həyata keçirilməlidir. Əgər müvafiq dövlət qurumunun rəhbəri (Dövlət Su Ehtiyatları Agentliyinin sədri Zaur Mikayılovu nəzərdə tutur - red.) qışa hazır olduqlarını deyirsə, lap yaxşı, bunu zaman göstərəcək".
"Biz də istəyirik ki, aidiyyəti qurumlar Bakı şəhərini və digər regionlarımızı qış mövsümünə lazımi səviyyədə hazırlasınlar. Mən bilirəm ki, su və kanalizasiya xətləri ilə bağlı ciddi problemlər var. Məsələn, seçildiyim 10 saylı Binəqədi üçüncü seçki dairəsində də bu sahədə xeyli çatışmazlıqlar mövcuddur və onlar hələ də öz həllini tapmayıb".
