Bakı Teleqüllə Kompleksi ərazisində sürüşmə təhlükəsi var? - RƏSMİ AÇIQLAMA + YENİLƏNİB

Rəqəmsal İnkişaf və Nəqliyyat Nazirliyinin “Radio-Televiziya Yayımı və Peyk Rabitəsi” İstehsalat Birliyi Bakı Teleqüllə Kompleksinin ərazisində sürüşməyə qarşı qabaqlayıcı tədbirlər görməyə hazırlaşması barədə daha bir açıqlama verib.

Birlikdən Oxu.Az-ın sorğusuna cavab olaraq bildirilib ki, 2020-ci ildə Bayıl yamacında baş vermiş sürüşmə ilə əlaqədar Bakı Teleqüllə Kompleksi ərazisində bir sıra qabaqlayıcı tədbirlərin görülməsi üçün layihələr hazırlanıb:

“Sözügedən layihələr üzrə işlərin yerinə yetirilməsi “Teleradio” İB-nin 2024-cü il satınalma planına daxil edilib”.

09:32

Rəqəmsal İnkişaf və Nəqliyyat Nazirliyi yanında “Radio Televiziya Yayımı və Peyk Rabitəsi” İstehsalat Birliyi Bakı Teleqüllə Kompleksinin ərazisində sürüşməyə qarşı qabaqlayıcı tədbirlər görməyə hazırlaşır.

Bu barədə Rəqəmsal İnkişaf və Nəqliyyat Nazirliyi məlumat yayıb.

Məlumata görə, bu tədbirlər Fövqəladə Hallar Nazirliyinin rəyi əsasında ilk dəfə görüləcək.

“Nazirliyin mütəxəssisləri burada qiymətləndirmə işləri aparıb və qərar veriblər ki, mümkün sürüşmə təhlükəsinə qarşı qabaqlayıcı tədbirlər görülsün”, - deyə məlumatda qeyd olunub.

Xatırladaq ki, Bakı Televiziya Qülləsi SSRİ Nazirlər Sovetinin qərarına və Azərbaycan SSR Rabitə Nazirliyinin sifarişi əsasında layihələşdirilib. Tikinti işləri 1979-cu ildə başlayıb və 1996-cı ildə inşası yekunlaşdırılıb. Qüllənin hündürlüyü 310 metrdir (Xəzər dənizi səviyyəsindən 480 metr). Bu Azərbaycan ərazisində ən hündür tikili və dünyada hündürlüyünə görə 38-ci Televiziya Qülləsidir.

İlhamə Əbülfət