Bu gün Xəzər dənizində qeydə alınan ardıcıl zəlzələlər ictimaiyyətin diqqət mərkəzinə çevrilib. Qısa zaman ərzində baş verən üç yeraltı təkan bölgədə seysmik aktivliyin artması ilə bağlı suallar doğurub və əhali arasında müəyyən narahatlıq yaradıb.
Azərbaycan Milli Elmlər Akademiyası nəzdində fəaliyyət göstərən Respublika Seysmoloji Xidmət Mərkəzinin baş direktoru Qurban Yetirmişli mövzu ilə bağlı Oxu.Az-a açıqlamasında bildirib ki, Xəzərdə baş verən zəlzələlərdən sonra qeydə alınan təkanlar afterşok xarakterlidir və enerji boşalması prosesi gedir.
Onun sözlərinə görə, bu hal təhlükəli hesab olunmur:
"Ümumiyyətlə, Xəzərdə zəlzələlər daha çox dərinlikdə baş verir. Qeydə alınan təkanlar əsasən 3-4 bal gücündə hiss olunub və dağıntı ehtimalı yoxdur. Bəlkə hansısa tövlədə balaca çatlar olsun. Sahilyanı ərazilər və xüsusilə Bakı üçün hər hansı real təhlükə yoxdur. Xəzər seysmoaktiv bölgədir. İl ərzində Azərbaycanda minlərlə zəlzələ qeydə alınır və onların arasında hiss olunanların yer alması normaldır. Hazırkı proses fonunda güclü, dağıdıcı zəlzələ gözlənilmir, yalnız afterşoklar müşahidə oluna bilər".
