Xuliqanlıq etməkdə və sağlamlığa qəsdən zərərvurmada təqsirləndirilənlər - Cahid Rasulov və Əli Abbasovun cinayət işi üzrə məhkəmə iclası keçirilib.
Oxu.Az-ın məlumatına görə, Bakı Ağır Cinayətlər Məhkəməsinin hakimi Neymət Məmmədovun sədrliyi ilə keçirilən prosesdə şahidlər ifadə veriblər.
Xəyal Qəniyev zərərçəkənin qardaşı olduğunu deyib:
"Hadisə vaxtı mən işdə olmuşam. Qardaşım zəng elədi ki, telefonlarım oğurlandı. Bununla bağlı qardaşım sonra dedi ki, tapmışıq uşaqları gələcəklər danışmağa. Mən də həmin vaxt getdim. Qardaşım onlarla görüşəndə birdən qışqırıq səsi eşitdim. Gördüm ki, qardaşımı aptekin qabağında bıçaqlayıblar. Sonradan bildim ki, çiyin-çiyinə dəyiblər, buna görə mübahisə edərkən qardaşımın telefonlarını götürüb qaçıblar".
Təqsirləndirilənlər isə öz növbəsində şahidin ifadəsinə cavab olaraq bildiriblər ki, onlar mübahisə zamanı zərərçəkənin telefonunu oğurlamayıblar, onun telefonunu öz telefonları ilə səhv salaraq yerdən götürüb gediblər.
Növbəti proses oktyabrın 26-na təyin edilib.
Qeyd edək ki, 2026-cı il yanvarın 22-də Cahid Rasulov tanışı Əli Abbasovla birlikdə Səbail rayonunun 20-ci yaşayış sahəsində yerləşən parkda olarkən tanışı Həsrət İsmayılovla birlikdə qarşıdan gələn Röyal Qəniyevin çiyninə qəsdən vuraraq onun ünvanına nalayiq ifadələr işlədib. Daha sonra Qəniyevə zərbə vuraraq yerə yıxıb və onun cibindən 2 400 manatlıq "iPhone 17 Pro" və 400 manat dəyərində olan "iPhone XR" telefonlarını götürüb. Cahid Rasulov buna mane olmaq istəyən Həsrət İsmayılova iki bıçaq zərbəsi vuraraq ona ağır bədən xəsarətləri yetirib. Faktla bağlı cinayət işi başlanılıb, hər iki şəxs Cinayət Məcəlləsinin 126.2.1 (qəsdən sağlamlığa ağır zərərvurma - iki və ya daha çox şəxsə qarşı habelə təkrar və ya bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik tərəfindən törədildikdə), 126.2.4 (ümumi təhlükəli üsulla, xuliqanlıq niyyəti ilə), 177.2.5 (oğurluq - zərərçəkmiş şəxsin üzərindən, cibindən, çantasından və ya digər əl yükündən çıxarılmaqla törədildikdə), 221.3 (xuliqanlıq - eyni əməllər), 228.5 (qanunsuz olaraq silah, döyüş sursatı, partlayıcı maddə və ya qurğular əldə etmə, saxlama, daşıma və gəzdirmə) maddələri ilə məsuliyyətə cəlb olunublar.
Elgün Həsənli
