Bakının mərkəzindəki yeraltı parkinqlərdən birində şlaqbaumun nasazlığı sürücülərin narazılığına səbəb olub.
Bununla bağlı Oxu.Az-ın qaynar xəttinə vətəndaş müraciəti daxil olub.
Bildirilib ki, uzun müddətdir Qış Parkının yeraltı parkinqində çıxış şlaqbaumlarından biri normal işləmir. Nəticədə avtomobillərin çıxışında uzun növbələr yaranır.
Sürücülərin sözlərinə görə, xüsusilə pik saatlarda, saat 18:00 radələrində vəziyyət daha da ağırlaşır. Onlar bəzən parkinqin daxilində yaranan tıxac səbəbindən təxminən 50 dəqiqəyədək gözləməli olduqlarını iddia edirlər.
Oxu.Az-ın sorğusuna cavab olaraq "AzParking"dən faktla bağlı bildirilib ki, sözügedən yeraltı parkinqdə mütəmadi olaraq belə bir problem yaşanmayıb:
"Yalnız bir dəfə təxminən 15-20 dəqiqə davam edən qısamüddətli sıxlıq qeydə alınıb. Bunun səbəbi bəzi sürücülərin parkinq ödənişi həyata keçmədən çıxış şlaqbaumuna yaxınlaşması olub. Ödəniş təsdiqlənmədiyi üçün şlaqbaum açılmayıb və nəticədə avtomobillər çıxışda növbə yaradıblar. Bu hal yeni parkinq sisteminə keçid prosesi ilə əlaqədardır. Keçid işləri üç iş günü ərzində başa çatacaq və proses gələn həftənin çərşənbə axşamı yekunlaşacaq. Bundan sonra sistem tam şəkildə normal rejimdə fəaliyyət göstərəcək", - deyə açıqlamada bildirilir.
