Baku TV "rus evi"ni yıxdı

Kubra Məhərrəmova yazır...

Dünən yerli KİV-də bu xəbər manşetə çıxdı: Azərbaycan hüquq-mühafizə orqanlarının əməkdaşları "Rossotrudniçestvo"nun Bakıdakı "Rus Evi"nin binasını nəzarətə götürüblər və bununla bağlı müşahidə kameraları quraşdırılıb. Binaya əməliyyat nəzarəti həyata keçirilir.

Bu, o deməkdir ki, əgər dünənə kimi bu "obyekt" uzaqdan nəzarətdə saxlanılırdısa, dünəndən canlı yayım rejimində müşahidə altındadır.

Bu, həm də o deməkdir ki, Rusiya ilə münasibətlərin rəsmi şəkildə ən yüksək səviyyədə olmasına rəğmən rəsmi Bakı heç kimə qırmızı xətləri keçməyə imkan verməyəcək.

Üstəlik bu, siyasi iradə və əzmin daha da möhkəmləndiyindən xəbər verir.

Bu hadisə fonunda digər ölkələrdən olan ekspertlər rəsmi Bakının bu qədər sərrast və dəqiq atəş açmasından yumşaq desək şoka düşüblər.

Bəli, rəsmi Bakı artıq sərhədlərini müəyyənləşdirib.

Gəlin bir az əvvələ qayıdaq. Bir neçə gün əvvəl Baku TV Bakının mərkəzində fəaliyyət göstərən "Rus evi"nin Azərbaycanın əleyhinə casusluq fəaliyyəti ilə məşğul olması barədə süjet yayımladı.

Və bildirdi ki, televiziya kanalının öz mənbələrini gizli saxlamaq hüququ var, bu məlumat da araşdırılıb, dəqiqləşdirilib və daha sonra yayımlanıb.

Süjet efirə gedər-getməz Azərbaycan səfiri Rusiya Xarici İşlər Nazirliyinə çağırılır və Baku TV-nin hazırladığı süjetlə bağlı narahatlıq və irad bildirilir.

Daha sonra Rusiya KİV-də Azərbaycanın, rəsmi Bakının və Baku TV-nin ünvanına böhtan və qarayaxma aksiyası başlayır.

Buraya qədər hər şey aydındır. Rusiya yüzillərdir eyni, şablon sxemlə işləyir.

Adamın lap "bir az diri oynayın" deməyi gəlir.

İndi keçək növbəti məsələyə.

Niyə "Rus Evi"nin casusluq fəaliyyəti ilə məşğul olduğu şübhə yaratmır?

Rusiya-Ukrayna müharibəsi başlayan gündən dünya ölkələrindən 450-dən çox Rusiya diplomatı deportasiya olunub.

Bu, əldə olan 450 nəfər diplomatik missiya ilə məşğul olanların Rusiya kəşfiyyatına işləməsi həmin ölkələrdə sübuta yetirilib.

Dünyanın aparıcı kəşfiyyat ekspertləri qeyd edirlər ki, ən asan kəşfiyyat modeli də elə budur. Rusiya dünyanın müxtəlif ölkələrinə casuslarını diplomat pasportla göndərir. Çünki bu kəşfiyyatçıya diplomatik toxunulmazlıq haqqını da verir. Təbii ki, belə şəraitlə kəşfiyyat materialları əldə etmək daha asandır. Əlavə olaraq Rusiya kəşfiyyatı yerli agentləri ələ almaq və onlarla əlaqəyə keçmək üçün də külli miqdarda pullar xərcləyir. Açıq internet mənbələrində belə bu rəqəmlər milyonlarla dollar məbləğində qeyd olunur.

Nəzərə alsaq ki, keçmiş Sovet hakimiyyəti dövründə rus kəşfiyyat məktəbi xeyli uğurlar əldə etdiyindən, bu gün də həmin uğurun üzərindən çıxış etməyə çalışır. Amma bir məsələ unudulur, artıq nə zaman o zamandır, nə də köhnə KQB məktəbindən bir şey qalıb.

Rusiya kəşfiyyatı isə Rusiya Ukrayna müharibəsində nə dərəcədə korrupsiyaya bulandığını, kəşfiyyat materiallarının səhv olduğunu bir daha sübut etdi.

Əgər yadınızdadırsa 2022-ci ilin fevralında Rusiya kəşfiyyatı və əks-kəşfiyyatı əmin idilər ki, Rusiya hərbi qüvvələri üç günə Kiyevi işğal edəcək və ukraynalılar rus əsgərlərini gül-çiçəklə qarşılayacaqlar.

Amma və lakin "dünyanın ikinci ən güclü ordusu" nəinki Kiyevdə möhkəmlənə bildi, əksinə Ukrayna Hərbi Qüvvələrinin ciddi qarşıdurması ilə üzləşdi. Bu müqavimətə Ukrayna xalqı da qoşuldu. Üçgünlük xüsusi hərbi əməliyyat üç ildir ki, davam edir.

Bundan əlavə Ukrayna Müdafiə Nazirliyinin Baş Kəşfiyyat İdarəsi rus bölmələrinin kolonnalarının Kiyevə doğru hansı istiqamətdə hərəkət edəcəyini də əvvəlcədən müəyyən etmiş və bunu hətta dərc də etmişdi. Təbii ki, Ukrayna kəşfiyyatının bu və buna oxşar digər məlumatı Rusiyanın yüksəksəviyyəli kabinetlərindən, kürsülərindən əldə olunur.

Çünki aydın məsələdir ki, küçədə günəbaxan tumu satan nənədə bu məlumat olmayacaq.

Məncə elə bu fakt sinəsinə döyən Rusiya kəşfiyyatının üzünə vurulan tərs şillədir.

Günü bu gün də Ukraynanın mübarizəsi, ayaqda olması həm də onun Rusiya ilə bağlı kəşfiyyat materiallarının əldə etməsi və ondan yararlanmasının sübutudur.

İndi qayıdaq Bakıda "Hökümət evi"nin arxasında HƏLƏ Kİ fəaliyyət göstərən "Rus evi"nə və onun rəhbəri olan Yevgeniy Primakova.

Əvvəla imperiya iddialarınızı aşağı salın. İkincisi unutmayın ki, Bakı Şərqin və Şərq fəlsəfəsinin ayrılmaz hissəsidir.

Bizim qədim diyar qonağa çox hörmət göstərər, ona ən yaxşı yeməyi, yatmağa ən yaxşı yeri verər. Hətta qonağın "əli əyri" olmasını görsə belə, gözünü yumar. Ona görə yox ki, qorxur, ona görə ki, bizim ədəbimiz fərqlidir.

Bizi Rusiya ilə əsrlər və tarixi hadisələr birləşdirir. Və bilməlisiniz ki, bu yüzillər boyu biz dostumuzu da, düşmənimizi də gözəl tanıyırıq. Və hər ikisinin güclü və zəif tərəflərini də müəyyən etmişik.

Bilirsinizmi, dünyanın ən gözəl xalılarını bizim qadınlar toxuyur. İlmə-ilmə, yavaş-yavaş, səbirlə. Və günlərin bir günü ortaya böyük, rəngarəng bir xalı çıxır.

Amma bu görüntünü əvvəldən heç kim görə bilməz. Xalını toxuyandan başqa. Çünki bütün naxışlar onun beynində, ilmələr isə onun əlindədir.

Lap kəşfiyyat materialları kimi.