Bakının Səbail rayonu, Bayıl qəsəbəsində tarixi əhəmiyyətli memarlıq abidəsi baxımsız vəziyyətdədir.
Oxu.Az xəbər verir ki, bununla bağlı sosial şəbəkədə paylaşım edilib.
Qeyd olunub ki, söhbət 5 nömrəli doğum evindən gedir.
"Bu bina tarixi əhəmiyyətli memarlıq abidəsidir. Buna baxmayaraq illərdir baxımsız vəziyyətdə qalıb. Halbuki 2023-cü ildə təmir üçün 15 milyon manata yaxın vəsait ayrılmışdı", - deyə şikayətdə bildirilir.
Oxu.Az-ın sorğusuna cavab olaraq Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətindən binanın tarixi olması təsdiqlənib.
Qeyd olunub ki, Qurban Abbasov küçəsi, 29 ünvanında yerləşən Doğum evinin binasının bərpası ilə bağlı təqdim edilən layihə qanunvericiliyə uğun olaraq, aidiyyəti qurumlarla razılaşdırılıb və Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti tərəfindən təsdiq olunub", - deyə açıqlamada bildirilir.
Qeyd edək ki, bina Tibbi Ərazi Bölmələrini İdarəetmə Birliyinin (TƏBİB) balansında olduğu üçün bərpa və istifadə ilə bağlı məsələlər sözügedən qurumun səlahiyyətindədir.
Məsələ ilə bağlı TƏBİB-ə sorğu ünvanlasaq da heç bir cavab ala bilmədik.
Xatırladaq ki, 2023-cü il oktyabrın 26-da İcbari Tibbi Sığorta üzrə Dövlət Agentliyinin keçirdiyi tenderin qalibinin "ORN GROUP" MMC olduğu və Kliniki Tibbi Mərkəzin tabeliyindəki 5 nömrəli Kliniki doğum evinin əsaslı təmiri işləri üçün şirkətlə 14 milyon 819 min 295 manat 14 qəpik məbləğində müqavilə bağlandığı məlumatları yayılmışdı.
:640.jpg)
