İqtisadiyyat naziri üçüncü "Yüksəliş" müsabiqəsinin qalibləri ilə görüşüb

İqtisadiyyat naziri Mikayıl Cabbarov üçüncü "Yüksəliş" müsabiqəsinin qalibləri Fərid İsayev və Əsəd Qurbanzadə ilə Mentorluq proqramı çərçivəsində növbəti görüş keçirib.

Oxu.Az xəbər verir ki, bu barədə İqtisadiyyat Nazirliyi məlumat yayıb.

Bildirilib ki, görüşdə proqram çərçivəsində görülmüş işlər, gənclərin fərdi inkişaf sahəsində qazandıqları yeni biliklər, onların idarəçilik səriştələrinin artırılması və gələcək planları barədə fikir mübadiləsi aparılıb. İqtisadiyyat naziri gənclərin Azərbaycanın inkişafı üçün həvəslə çalışmalarını, bilik və bacarıqlarını davamlı şəkildə artırmalarını təqdir edib, gələcəyə inamlı baxışları olan yeni nəslin ölkəmiz üçün əvəzolunmaz kapital olduğunu vurğulayıb.

"Yüksəliş" müsabiqəsinin qalibləri Mentorluq proqramı çərçivəsində keçirilən görüşlərin faydasını qeyd edərək, aparılan fikir mübadiləsinin onların idarəçilik təcrübələrinin və peşəkar vərdişlərinin təkmilləşdirilməsinə böyük stimul verdiyini bildiriblər.

Qeyd edək ki, İqtisadiyyat Nazirliyi və "Yüksəliş" İctimai Birliyi tərəfindən Mentorluq proqramı çərçivəsində qaliblərin istəkləri nəzərə alınmaqla fərdi inkişaf planları hazırlanıb. Buna uyğun olaraq, mentilərin dövlət və özəl sektor, beynəlxalq konsaltinq şirkətlərinin nümayəndələri ilə görüşləri təşkil edilib, müxtəlif istiqamətlərdə maraqlı müzakirələr aparılıb. Qaliblərin fərdi inkişafına dəstək göstərmək məqsədilə onlar təlim və Nazirlik tərəfindən təşkil olunan "4SİM Talks" layihəsində iştiraka cəlb olunublar. Fərdi inkişaf planları üzrə bilik və bacarıqlarının artırılması üzrə işlər davam etdirilir.

17:40

Dördüncü "Yüksəliş" müsabiqəsinin əyani mərhələsi başa çatıb. Müsabiqənin əyani mərhələsi çərçivəsində baş tutan "İdarəetmə bacarıqları" imtahanında iştirak etmiş 1 282 iştirakçıdan 328 nəfəri yarımfinal mərhələsində iştirak hüququ qazanıb.

Oxu.Az xəbər verir ki, bu barədə "Yüksəliş" müsabiqəsi məlumat yayıb.

Nəticələrə əsasən, maksimal T-bal 728, o cümlədən keçid balı 555 bal təyin edilib. Mərhələ adlayanlardan 281 nəfəri kişi, 47 nəfəri isə qadındır. Yarımfinal mərhələsinə keçən iştirakçıların 44,08%-i dövlət, 49,62%-i özəl, 3,53%-i QHT, 2,77%-i isə beynəlxalq qurumlarda çalışır.

"Yüksəliş"ə ilk dəfə qoşulmuş namizədlərdən 82-i, əvvəlki 3 müsabiqədə iştirak etmiş şəxslərdən isə 49-u bu il yarımfinalda yarışacaq.

Qarşıda iştirakçıları 5-7 iyul tarixlərində baş tutacaq yarımfinal mərhələsi gözləyir. Yarımfinal mərhələsindən sonra isə iyulun 19-21-də final mərhələsinin keçirilməsi ilə dördüncü "Yüksəliş" müsabiqəsi başa çatacaq.

Qeyd edək ki, "Yüksəliş" müsabiqəsi Azərbaycan Respublikasının Prezidenti İlham Əliyevin 26 iyul 2019-cu il tarixində imzaladığı Sərəncamla təsis olunub. Müsabiqə qalibləri mentorlar (https://yukselish.az/mentors.html) tərəfindən birillik fərdi inkişaf planı və özünüinkişaf üçün 20 min manat məbləğində pul mükafatı əldə edirlər.

Sayca dördüncü "Yüksəliş" müsabiqəsinin keçirilməsi ilə bağlı Azərbaycan Respublikasının Prezidenti İlham Əliyev tərəfindən 25 dekabr 2023-cü il tarixində müvafiq Sərəncam imzalanıb.