"Hansısa virusda pandemiya potensialı varsa, bu, narahatlıq üçün ciddi əsasdır".
Bu fikirləri Oxu.Az-a açıqlamasında professor Adil Qeybulla "Honkonq qripi" ilə bağlı vəziyyəti şərh edərkən deyib.
O bildirib ki, qrip uzun müddətdir bəşəriyyətin əziyyət çəkdiyi infeksiyalardan biridir və onun üç forması mövcuddur:
"Qripin "A", "B" və "C" formaları var. Ən çox xəstəlik törədən isə "A" tipidir. Bu növ insan və heyvanlarda ciddi problemlər yaradır. Sözügedən növün tarix boyu bir neçə təhlükəli növü olub. Qrip RNT daşıyıcılı virus olduğuna görə hər il mutasiyaya uğrayır və yeni formaları yaranır. Bu da onu deməyə əsas verir ki, nə vaxtsa qrip yenidən pandemiyaya çevrilə bilər. Ümumdünya Səhiyyə Təşkilatı (ÜST) qripi gələcəkdə insan sağlamlığını təhdid edən 10 amildən biri kimi göstərib. Bu baxımdan, hər an qrip pandemiyasının baş verəcəyi gözləniləndir. Qeyd etmək vacibdir ki, "Honkonq qripi" "A" kateqoriyasına daxildir və onun potensialını dəqiq proqnozlaşdırmaq çətindir. Artıq epidemiya yaratdığı göz önündədir. Buna görə də məsələ diqqətdə saxlanmalı, ehtiyatlı yanaşılmalıdır. ÜST COVID-19 pandemiyası dövründə moderator rolunu uğurla yerinə yetirə bilmədi. Düzdür, burada ölkələrin də koordinasiya çatışmazlığı müşahidə olunurdu. Bu isə bizi ciddi narahat edir".
Professor virusun geniş yayılmasının qarşısını almaq məqsədilə görülməli olan tədbirləri də açıqlayıb:
"Əsasən transsərhəd keçid məntəqələrində nəzarət gücləndirilməlidir. İnsanlar düzgün məlumatlandırılmalıdır. Təəssüf ki, COVID-19 pandemiyası zamanı bəzi dövlətlər vəziyyəti gizlətməyə çalışdı və nəticədə ağır fəsadlar ortaya çıxdı. Ona görə də maarifləndirmə xüsusi əhəmiyyət daşıyır. Qloballaşan dünyada yaşayırıq. Virus hava-damcı və nəfəs yolu ilə ötürülə bildiyi üçün geniş yayılma ehtimalı yüksəkdir. Xəstəliyin gedişi kifayət qədər ağır olur. Bu infeksiya uzun müddət keçməyən yüksək hərarət, halsızlıq, bel və baş ağrıları ilə müşahidə edilir. Hesab edirəm ki, immuniteti zəif olan şəxslər, xüsusilə COVID-19 keçirmiş insanlar bu virusa daha tez yoluxa və onu daha ağır formada keçirə bilərlər".
Məlik Məlikov
