Qusar rayonuna yağan leysan ciddi fəsadlar törədib.
Oxu.Az ANS PRESS-ə istinadən xəbər verir ki, şiddətli yağışlar rayonun Yuxarı Meyar, Suray, Düz Sahil kəndlərində müşahidə olunub. Nəticədə həmin ərazilərdə olan kəndarası yolları sel yuyub.
Dəyən ziyanın aradan qaldırılması üçün müvafiq texnikalar həmin ərazilərə cəlb olunub. Düz Sahil və Xura kəndlərindəki 10-a yaxın evin zirzəmisinə də su dolub.
Qeyd edək ki, ötən gecə Quba rayonuna da yağan leysan yağışları fəsadlar yaradıb. Rayonun Tüləkəran ərazisinə yağan intensiv yağışlar əhaliyə ciddi ziyan vurub.
Rayon Fövqəladə Hallar Komissiyasından bildiriblər ki, Tülər kəndində sakinlərə məxsus bir neçə heyvanı sel aparıb. Onlarla evin həyət-bacası su altında qalıb.
Həmçinin kənd yolunun üstündəki körpü də uçub. Möhüc kəndinə gedən körpü də uçmaq təhlükəsi ilə üzləşib.
