Türkiyənin Kahramanmaraş vilayətində inşa edilən "Azərbaycan məhəlləsi"nin tikintisi başa çatdırılıb.
Oxu.Az-ın Türkiyəyə ezam olunmuş əməkdaşı xəbər verir ki, məhəllənin dörd kvartalında 26 binanın inşası yekunlaşıb. Həmin çoxmərtəbəli binalarda ümumilikdə 456 mənzil və 328 qeyri-yaşayış obyekti mövcuddur.
Mənzil İnşaat Dövlət Agentliyin (MİDA) Aparat rəhbəri Fərman Qurbanlı Oxu.Az-a açıqlamasında bildirib ki, mədəniyyət mərkəzinin inşasının da bir il ərzində tamamlanması planlaşdırılır:
"Məhəllənin ümumi sahəsi 27.6 hektar təşkil edir. Layihəyə əsasən massiv yaşayış binaları, ibtidai məktəb, uşaq bağçası və mədəniyyət mərkəzindən ibarətdir. Burada iki, üç və dörd otaqlı ümumilikdə 1 194 mənzildən ibarət 68 yaşayış binası mövcuddur. Eyni zamanda, həmin ərazidə məskunlaşacaq sakinlərin iş yerləri ilə təmin olunması məqsədilə yaşayış binalarında 1 595 qeyri-yaşayış (ticarət) obyekti istifadəyə veriləcək".
Xatırladaq ki, 2025-ci il iyunun 19-da Prezident İlham Əliyev və Türkiyə Prezidenti Rəcəb Tayyib Ərdoğanın iştirakı ilə "Azərbaycan məhəlləsi"nin açılışı olub, mənzillərin açarları sakinlərə təqdim edilib.
Ərazidəki digər mənzillərin fevralın 6-da fəlakətin 3-cü ildönümündə təqdim olunması nəzərdə tutulur.
Mərahim Nəsib
