İmişlidə keçmiş SSRİ bayrağı qaldıran sədr danışdı: "Bunun nəyi pisdir ki?"

İmişli rayonunda 9 May Qələbə günü tədbiri zamanı keçmiş SSRİ bayrağı qaldıran rayonun Ağsaqqallar Şurasının sədri Saleh Səmədov məsələyə aydınlıq gətirib.

Oxu.Az Modern.az-a istinadən xəbər verir ki, Saleh Səmədov burada heç bir pis şeyin olmadığını bildirib:

"Bunun nəyi pisdir ki? SSRİ kimi böyük dövlət olub, onun bayrağıdır. İkincisi, bunun sizə nə aidiyyəti var. Boş-boş işlərlə məşğul olursunuz".

Saleh Səmədov qeyd edib ki, sözügedən tədbir abidənin açılışı ilə bağlı idi, həmin müharibə də o bayraq altında baş verib:

"Bir dövlət yoxdursa, bayrağı ola bilərmi?! Bu sadəcə olaraq bizim tariximizdir. Burada nə var ki?! Cavan nəsil o bayrağı bilmir... Bayramlarımız da o bayraq altında keçib. Müharibənin rəmzi olaraq biz o bayrağı oraya qoymuşduq. "Georgi lenti" də rəmzdir, ona görə də taxmışdım. Azərbaycan bayrağından uca bayraq yoxdur, o bizim hər zaman başımızın üstündədir. Burada Türkiyə bayrağı da dalğalanır, bəs ona niyə bir söz demirsiniz?! SSRİ bayrağı orada bir neçə saatlıq qaldı və yığışdırıldı. Türkiyə bayrağı isə küçələrdədir. Bir dövlətin içərisində bir bayraq olur. Siz o zaman Türkiyə bayrağına niyə qarışmırsınız?!".

13:36

İmişli rayonunda 9 May - Faşizm Üzərində Qələbə Günü münasibətilə keçirilən tədbirdə maraqlı hadisə qeydə alınıb.

Oxu.Az Yenisabah.az-a istinadən xəbər verir ki, tədbirin keçirildiyi xiyabanda Azərbaycan dövlət bayrağı ilə yanaşı, keçmiş SSRİ bayrağı da dalğalanıb. Üstəlik, "Den Pobedı" ("Qələbə Günü") sovet mahnısı da səsləndirilib.

Həmin görüntülər sosial şəbəkələrdə birmənalı qarşılanmayıb. Bu faktı qınayanlar çoxluq təşkil edib.

Məsələ ilə bağlı İmişli Rayon İcra Hakimiyyətinin başçısının birinci müavini Mirzə Quliyev bildirib ki, hazırda bayraq qalmaqalı ilə bağlı araşdırma aparılır:

"Bu hadisədən xəbərimiz var. Həmin bayrağı xiyabanda rayon ağsaqqallar şurasının sədri sancıb. Hazırda bu barədə araşdırma aparılır. Lazımi tədbirlər görüləcək".