Abşeron rayonunun Mehdiabad qəsəbəsində küçələrin gecə saatlarında işıqlandırılmaması sakinlərin narazılığına səbəb olub.
Bu barədə Oxu.Az-ın qaynar xəttinə (+994 55 224-12-12) şikayət daxil olub.
Bildirilib ki, qəsəbənin bir çox küçəsində işıqlandırma sistemi yoxdur.
"Xüsusilə ikinci növbədə təhsil alan azyaşlı şagirdlər üçün təhlükə yaranır, onlar dərsdən sonra evlərinə qaranlıq küçələrlə qayıtmalı olurlar. Küçələrdə sahibsiz itlərin olması vəziyyəti daha da çətinləşdirir. Hava qaralanda evə gəlmək, yaxud harasa getmək problemə çevrilir. Gördüyünüz fotolar məktəbə yaxın küçələrin gecə saatlarında olan vəziyyətini əks etdirir. Problem isə təkcə həmin ərazi ilə məhdudlaşmır, qəsəbənin digər küçələri də qaranlığa qərq olur", - deyə şikayətdə bildirilir.
Məsələ ilə bağlı aidiyyəti üzrə sorğu verilib.
