"Oleq Bakinski" kimi tanınan ukraynalı iş adamı Oleq Krapivin və onunla birgə ittiham olunan Konstantin Kuçerin cinayət işi üzrə məhkəmənin yekun prosesi keçirilib.
Oxu.Az-ın məlumatına görə, Bakı Ağır Cinayətlər Məhkəməsinin hakimi Elnur Nuriyevin sədrliyi ilə keçirilən sonuncu prosesdə hökm oxunub.
Hökmə əsasən, Oleq Krapivin xuliqanlıqda təqsirli bilinərək 6 ay sınaq müddəti seçilməklə, 2 il 6 ay müddətinə şərti cəzalandırılıb. Konstantin Kuçerə isə ittiham olunduğu xüsusilə külli miqdarda dələduzluq maddəsi ilə bəraət verilib. Ona xuliqanlığa görə 2 il 6 ay həbs cəzası təyin edilib.
Xatırladaq ki, ötən prosesdə dövlət ittihamçısı təqsirləndirilən Konstantin Kuçerin 14 il, Oleq Krapivinin isə 3 il azadlıqdan məhrum edilməsini məhkəməyə təklif etmişdi.
Qeyd edək ki, Oleq Krapivinə Cinayət Məcəlləsinin 221.3-cü (xuliqanlıq, silah qismində istifadə olunan əşyalardan istifadə etməklə törədildikdə), 127.2.3 (Qəsdən sağlamlığa az zərər vurma), təqsirləndirilən Konstantin Kuçerə isə 178.4-cü (dələduzluq - xüsusilə külli miqdarda ziyan vurmaqla törədildikdə), 221.3-cü (xuliqanlıq, silah qismində istifadə olunan əşyalardan istifadə etməklə törədildikdə) maddəsi ilə də ittiham verilib.
Cinayət işi üzrə Rusiya vətəndaşı Zaxarenkov Valeriy Nikolayeviç, "Aviazapçast" ASC və "Promışlennie Postavki Kazaxstan" MMC zərərçəkmiş qismində tanınıb.
"Oleq Bakinski" DİN Mütəşəkkil Cinayətkarlığa Qarşı Baş İdarəsi tərəfindən Bakıda həbs edilmişdi. Ötən prosesdə isə təqsirləndirilən Oleq Krapivinin səhəti ilə bağlı vəkilinin vəsatətini məhkəmə təmin edərək onun barəsindəki həbs qətimkan tədbirinin ev dustaqlığı ilə əvəz olunması barədə qərar çıxarmışdı.
