Qəbələ rayonunun Vəndam qəsəbəsinin Girvə adlanan ərazisinin, eləcə də ətrafdakı Həzrə, Bunud, Məmmədağalı və Seyidqışlaq kəndlərinin sakinləri təbii qazın olmamasından şikayətçidirlər.
Sakinlər bununla bağlı Oxu.Az-a müraciət edərək bildiriblər ki, adıçəkilən yaşayış məntəqələri indiyədək qazlaşdırılmayıb.
Onların sözlərinə görə, xüsusilə qış aylarında vəziyyət daha da çətinləşir. Belə ki, əhali evlərini isitmək və məişət ehtiyaclarını qarşılamaq üçün odun almağa məcbur olur.
Sakinlər bildirirlər ki, odunun ilbəil bahalaşması ailələrin maddi vəziyyətinə də mənfi təsir göstərir. Bəzi insanların büdcəsi ümumiyyətlə odun almağa imkan vermir.
Müraciətdə diqqətə çatdırılıb ki, ərazidə qaz xətlərinin yaxınlıqdan keçməsinə baxmayaraq, yaşayış məntəqələri hələ də təbii qazla təmin olunmayıb.
"Çox abad və turistik ərazidə yaşayırıq. Qaz xətləri evlərimizin yanından keçsə də, müasir dövrdə hələ də qaz üzünə həsrətik", - deyə sakinlər bildiriblər.
Onlar qeyd ediblər ki, təbii qazın olmaması insanların meşə ehtiyatlarından istifadəsini artırır ki, bu da ekoloji baxımdan arzuolunmaz nəticələr yaradır:
"Vətəndaşlar təbiətə zərər vurmaq istəməsələr də, alternativləri olmadığından buna məcbur qalırlar.
Bu məsələ ilə bağlı aidiyyəti qurumlara dəfələrlə müraciətlər etmişik. Ancaq bizə qaz əvəzinə indiyədək müxtəlif vədlər verilib. İllər keçməsinə baxmayaraq problem öz həllini tapmayıb. Hər dəfə yeni bəhanələr göstərilərək qazlaşdırma prosesi qeyri-müəyyən vaxta qədər təxirə salınır. Ucqar olmayan adıçəkilən yaşayış məntəqələrinin hələ də qazsız qalmasının səbəbi bizə aydın deyil".
Sakinlər Vəndam qəsəbəsinin Girvə ərazisinin, həmçinin Həzrə, Bunud, Məmmədağalı və Seyidqışlaq kəndlərinin qazlaşdırılması üçün aidiyyəti qurumların tədbir görməsini istəyirlər.
"Azəriqaz" İstehsalat Birliyinin Mətbuat Xidmətindən Oxu.Az-ın sorğusuna cavab olaraq bildirilib ki, sözügedən ərazilərin qazlaşdırılması məsələsinə qurumun maliyyə imkanları nəzərə alınmaqla baxılacaq.
