Rəşad Nəbiyev: "Hadisənin başvermə səbəbləri və təfərrüatı ətraflı şəkildə öyrəniləcək"

"Qəza zamanı həyatını itirən şəxslərin ailələrinə başsağlığı diləyirik. Həyatını itirmiş insanların kədərinə şərikik. Xəsarət alan şəxslərin fəal həyata qayıtması üçün cənab Prezident tərəfindən aidiyyəti qurumlara tapşırıq verilib".

Oxu.Az xəbər verir ki, bu fikirləri təyyarə qəzasında həlak olmuş pilotlar İqor Kşnyakin, Aleksandr Kalyaninov və bələdçi Hökumə Əliyeva ilə keçirilən vida mərasimində rəqəmsal inkişaf və nəqliyyat naziri Rəşad Nəbiyev deyib.

O bildirib ki, verilmiş şahid ifadələri, eyni zamanda, təyyarə qalıqları bizə deməyə tam şəkildə əsas verir ki, təyyarə xarici texniki və fiziki təsir altında qəzaya uğrayıb.

"Yaradılmış dövlət komissiyasına verilmiş tapşırıq bundan ibarətdir ki, hadisənin başvermə səbəbləri və təfərrüatı ətraflı şəkildə öyrənilsin. Azərbaycanın hava yolları təhlükəsizlik və keyfiyyət standartlarına görə dünya miqyasında etibarlı hava yollarından biri kimi tanınır. Xüsusilə, təcrübəli pilotların peşəkarlığı və sücaəti bu sahədə böyük əhəmiyyət kəsb edir. Onların çətin anlarda göstərdiyi qəhrəmanlıq Azərbaycan aviasiya tarixində silinməz iz buraxıb", - deyə nazir qeyd edib.

Xatırladaq ki, vida mərasimi Heydər Əliyev adına Beynəlxalq Hava Limanında keçirilir.

Məhərrəm Əliyev