Şabran rayonunun Ərəblər kəndin sakinləri son günlər elektrik enerjisinin verilməsində yaranan fasilələrdən narazıdırlar.
Oxu.Az-a daxil olan müraciətdə bildirilib ki, artıq üç gündür hər səhər elektrik enerjisi kəsilir, yalnız axşam saatlarında bərpa olunur.
Sakinlərin sözlərinə görə, ərazidə dağıdıcı külək müşahidə olunmadığı halda elektrik enerjisinin uzun müddət dayandırılması gündəlik həyatda ciddi çətinliklər yaradır.
"Soyuducuda olan bütün ərzaqlar xarab olur. Evdə istidən oturmaq mümkün deyil. Çörəyi sobada bişirənlər var, bunun üçün də elektrik lazımdır. Kənddə market olmadığı üçün gündəlik ərzaq almaq da mümkün deyil", - deyə müraciətdə qeyd olunub.
Sakinlər həmçinin bildiriblər ki, problemlə bağlı "199" Çağrı Mərkəzinə dəfələrlə zəng etsələr də, əlaqə saxlaya bilməyiblər. "Ümumiyyətlə, zəng getmir", - deyə onlar əlavə ediblər.
Məsələ ilə bağlı "Azərişıq" ASC-yə sorğu ünvanlanıb.
