"Sosial şəbəkələrdən əvvəlki dövrün şagirdləri ilə indiki nəsil arasında nəzərəçarpacaq fərqlər var".
Bu fikirləri Oxu.Az-a açıqlamasında Bakı şəhəri 149 nömrəli məktəbin kimya müəllimi Şəlalə Həsənova sosial şəbəkələrdə uşaqlar barəsindəki yeni tənzimləmələri şərh edərkən deyib.
O bildirib ki, əvvəlki dövrdə uşaqlar məlumatı əsasən kitablardan, kitabxanalardan və müəllimlərdən əldə edirdilər:
"Bu, onları daha çox oxumağa, araşdırmağa, müxtəlif mənbələri müqayisə etməyə və nəticə çıxarmağa sövq edirdi. Hər hansı mövzunu mənimsəmək üçün şagirdlər əlavə ədəbiyyata müraciət edir, məlumatı hazır şəkildə qəbul etmək əvəzinə onu axtarır, təhlil edir və yadda saxlayırdılar. Bu proses onların oxuyub-anlama, məntiqi düşünmə və analitik təfəkkür bacarıqlarının inkişafına mühüm töhfə verirdi. Müasir dövrdə isə informasiya çox asan və sürətli şəkildə əldə olunur. Şagirdlər qısa videolara və sürətli informasiya axınına fokuslandıqları üçün uzun mətnləri oxumaqda, mövzunu dərindən mənimsəməkdə və təhlil etməkdə çətinlik çəkirlər. Onlar texnologiyadan istifadə baxımından əvvəlki nəsillə müqayisədə daha bacarıqlıdırlar, lakin bu bacarıqlar oxuyub-anlama, məntiqi düşünmə və analitik təfəkkürü əvəz etmir".
Pedaqoq vurğulayıb ki, sosial mediada məlumatların qısa və sürətli formada təqdim olunması şagirdin diqqətini tez-tez bir mövzudan digərinə yönəldir:
"Nəticədə beyin uzun müddət eyni mövzu üzərində işləməyə alışmır, şagird oxuduğunu tam anlaya və mətn üzərində təhlil apara bilmir. Sosial şəbəkələrdən istifadənin yaşa uyğun tənzimlənməsi Azərbaycan təhsili üçün müsbət nəticələr verə bilər. Bu halda şagirdlərin dərsə ayırdığı vaxt artacaq, sosial şəbəkələrdə keçirdikləri vaxtın bir hissəsini ev tapşırıqlarına, mütaliəyə və özünüinkişafa yönəldə biləcəklər. Hesab edirəm ki, bu, həm də uşaqların sosial sağlamlığına, canlı ünsiyyət bacarıqlarına və kollektivdə davranış mədəniyyətinin formalaşmasına müsbət təsir göstərəcək. Məqsəd uşaqları texnologiyadan uzaqlaşdırmaq deyil, onların ondan daha şüurlu, təhlükəsiz və səmərəli istifadə etmələrinə nail olmaqdır. Texnologiya təhsilə xidmət etməlidir, onu əvəz etməməlidir".
Ş.Həsənova qeyd edib ki, kimya fənni yalnız düsturların və reaksiyaların əzbərlənməsindən ibarət deyil:
"Bu fənnin əsas mahiyyəti səbəb-nəticə əlaqələrini qurmaq, prosesləri anlamaq və məntiqi təfəkkürdən istifadə etməkdir. Şagird mövzunu dərk etmirsə, nə kimyəvi reaksiyaların mahiyyətini, nə də laboratoriyada aparılan analizlərin məqsədini düzgün anlayır. Oxuyub-anlama bacarığı bütün fənlər, o cümlədən kimya üçün fundamental əhəmiyyət daşıyır. Qanun qüvvəyə mindikdən sonra nəticələrin dərhal görünəcəyini gözləmirəm, bu, zaman tələb edən bir prosesdir. Lakin düşünürəm ki, düzgün tətbiq olunduğu təqdirdə, bu dəyişiklik gələcək nəsillərin intellektual inkişafına mühüm töhfə verəcək".
