Sumqayıtda "Yaşıl dərə" adlanan ərazidəki tunelə çirkab suları yığılıb.
Oxu.Az xəbər verir ki, bununla bağlı videogörüntü yayımlanıb.
Qeyd olunub ki, tunelə sularının yığılması səbəbindən avtomobillərin hərəkəti mümkünsüz olub.
Problemin ərazidən keçən Azərbaycan Dəmir Yollarına (ADY) məxsus nasosda nasazlıq yaranması səbəbindən yarandığı bildirilib.
Oxu.Az-a açıqlamasında ADY-nin İctimaiyyətlə əlaqələr şöbəsinin müdiri Bəxtiyar Hacıyev nasosların təmsil etdiyi quruma aid olduğunu təsdiqləyib.
"Sumqayıtda avtomobil yolu tunelində çirkab sularının yığılmasına səbəb elektrik enerjisinin verilişində yaranmış fasilə ilə əlaqədar su nasoslarının fəaliyyətinin dayanması olub. Hazırda ərazidə yığılmış suların kənarlaşdırılması işləri həyata keçirilir. İşlər başa çatdıqdan sonra qısa müddət ərzində nəqliyyatın hərəkəti bərpa olunacaq. Bizim qurum da köməklik məqsədilə körpüyə yığılan suyun çəkilməsi üçün nasoslar quraşdırıb", - deyə B.Hacıyev bildirib.
Oxu.Az-ın sorğusuna cavab olaraq İri Şəhərlərin Su Təchizatından (İŞST) bildirilib ki, ərazidəki nasoslar onlara aid deyil. Amma yaranmış problemin aradan qaldırılması üçün kömək məqsədilə əraziyə texnika cəlb ediblər.
