Suqovuşandan elektrik enerjisi yaxınlıqdakı kəndlərə veriləcək

İşğaldan azad olunmuş Suqovuşan qəsəbəsinə verilən 35 kV-luq elektrik xətti ilə ərazidəki kəndlər də enerji ilə təmin ediləcək. 

“Azərişıq” ASC-nin mətbuat xidmətinin rəhbəri Vaqif Aydınoğlu Oxu.Az-a açıqlamasında yarımstansiyadan çəkilən xəttin ilk növbədə Talış və Suqovuşan ərazilərini əhatə edəcəyini bildirib.

Onun sözlərinə görə, burada digər kəndlər də var ki, onların yalnız adı var:

“Bu kəndlər bütövlüklə dağıdılıb və ərazidə tikili yoxdur. Biz bu yarımstansiya ilə altyapını hazır edirik. Gələcək dövrdə hansı kəndlər bərpa ediləcəksə, artıq burada elektrik verilişində problem olmayacaq. 35 kV-luq enerji xətti ilə bütün bu əraziləri elektrik enerjisi ilə təmin edə biləcəyik”. 

Qurumun mətbuat xidmətinin rəhbəri əlavə edib ki, ən vacib olan məsələ torpaqdan səmərəli istifadədir ki, izolyasiyalı xətt vasitəsilə bunu təmin etmək mümkündür:

“Ənənəvi xəttin çəkilişi zamanı onun hər iki tərəfində məsafə saxlamaq lazım gəlir. Ümumilikdə 60 metrlik mühafizə zolağı yaranır. İzolyasiyalı xətdə isə mühafizə zolağı demək olar ki, sıfıra enir”. 

“Azərişıq Qarabağda” layihəsi çərçivəsində Suqovuşan ərazisində işlər yekunlaşdırılıb. Suqovuşan qəsəbəsinə 110/35/6 kV-luq Tərtər yarımstansiyasından yeni elektrik verilişi xətti çəkilib. 35 kV-luq xətt izolyasiyalı kabellə çəkilib. 

Qeyd edək ki, istifadə edilən müasir izolyasiyalı və mühafizəli 35 kV kabel xəttindən istifadə ənənəvi elektrik veriliş xəttinə nisbətən xəttin texniki itkilərini 2,3 dəfə, illik qəza və planlı açılmalar sayını 25-30 dəfə, sərt iqlim şəraitində, qarlı və buzlu havalarda qəza təhlükəsini dəfələrlə, istifadə olunan dayaqlara çəkilən xərcləri 3-5 dəfə, istismar və saxlanma xərclərini 4 dəfə azaltmaqla yanaşı, əhalinin həyat və sağlamlığına təhlükə ehtimalı aradan qaldırılır, hər 1 km elektrik xəttinin mühafizə zonasına görə 5 dəfədən artıq faydalı torpaq sahəsinin istifadəsinə imkan verir.

Nigar Məmmədova