Tahir Salahovun ev-muzeyi Azərbaycan Respublikası Prezidentinin sərəncamı ilə "İçərişəhər" Dövlət Tarix-Memarlıq Qoruğu İdarəsi tərəfindən 2012-ci ildə yaradılıb. Burada rəssamın Vətəninə bağışladığı və özünün rəsm əsərlərindən, şəxsi arxivindən ibarət kolleksiya nümayiş olunur.
Kolleksiya 700-dən çox eksponatdan ibarətdir.
Muzey ekspozisiyası üçmərtəbəli evdə yerləşir. Muzeyə daxil olduqda ziyarətçilər Tahir Salahovun ictimai fəaliyyətini əks etdirən zəngin fotoqalereya ilə tanış olurlar.
Burada rəssamla birgə dünyanın ən görkəmli siyasi, ictimai və bədii xadimlərini görmək olar. Muzeydə qrafik janrda çəkilmiş dünyaşöhrətli portretlər asılıb, nümayiş etdirilən əsərlər rəssamın orijinal işləridir. Divarlarda, həmçinin, Tahir Salahovun illər boyu topladığı əl işi olan xalçalar və misdən düzəldilmiş məmulatlar yer alır.
Muzeyin ikinci hissəsində, 1-ci və 2-ci mərtəbələrdə böyük sənətkarın əsərlərinin kolleksiyası nümayiş etdirilir. Burada Tahir Salahovun ötən əsrin 60-ci illərindən bəri çəkdiyi əsərləri görmək olar. Muzeyin 3 mərtəbəsində isə rəssamın emalatxanası yerləşir. Rəsm əsərlərinin yaradıldığı məkanda molbertlər, fırçalar, boyalar və çoxsaylı rəsmlər görmək mümkündür.
PhotoStock.az-ın muzeydən hazırladığı fotoreportajı təqdim edirik:
Daha çox foto: PhotoStock.az
