Tovuz sakinləri TƏHLÜKƏDƏ: 45 ildir qəzalı vəziyyətdə olan körpü UÇDU

Tovuzun dağətəyi relyefə malik, təxminən 1000-ə yaxın sakini olan Məşədilər kəndi rayon mərkəzindən xeyli aralıdadır. 350-ə qədər yaşayış evi olan bu kənddə nə tibb məntəqəsi, nə də hər hansı bir səhiyyə müəssisəsi var. Bu kəndi Tovuzun digər şəhər və kəndlərindən Zəyəmçay çayı ayırır. Kənd camaatı alış-veriş, həkim üçün rayon mərkəzinə bu çayın üzərindən keçməklə gedə bilir.

Bu məqsədlə kənddə yaşayanlar öz hesablarına təqribən ötən əsrin 80-ci illərində dəmirdən ensiz bir körpü salıblar. 45 ildir xalqa xidmət edən körpü qəzalı vəziyyətə düşüb. Hər il bir neçə dəfə sel sularının fəsadları nəticəsində zərər görən bu körpü hazırda təhlükəli hal alıb. Bu ilin yazında Zəyəmçaydan selin keçməsi körpünü daha da qəzalı edib.

Oxu.Az Bizim.media-ya istinadən xəbər verir ki, kənd sakini Elçin Həsənov qəzalı körpünün hər an uça biləcəyini deyib:

"Hər gün bu körpüdən istifadə edirik. Kəndə başqa yol yoxdur. Oradan keçəndə özümüzü riskə atırıq. Çox pis vəziyyətdədir. Hər an uçmaq təhlükəsi var. Sel gələndə də, ümumiyyətlə, keçə bilmirik. Kənd maşınlarının yarısı o tayda, yarısı bu tayda qalır. Heç piyada da keçə bilmirik. Yaxın vaxtlarda burada yeni körpü tikilməsə, hansısa bədbəxt hadisə baş verəcək", - deyə kənd sakini əlavə edib.

Kənd sakinlərinin sözlərinə görə, Zəyəmçayda suyun səviyyəsi aşağı olduğu müddətdə çoxtonnajlı, iriqabaritli maşınlar çaydan keçə bilir. Lakin çayda sululuq çox olduqda buradan da keçə bilmir. Körpü ensiz olduğundan bir minik avtomobili güc-bəla ilə keçib gedə bilir. Qabaritləri böyük olan yük avtomobilləri isə, ümumiyyətlə, keçə bilmir. Üstəlik sakinlər kənd təsərrüfatı ilə məşğul olduqlarından yük avtomobilləri ilə ot tədarükü, meyvə satışı və digər daşımaları körpü səbəbindən həyata keçirə bilmirlər.

Məşədilər kəndinin digər sakini Fəxrəddin Ələsgərov körpünün təxminən 80-ci illərdə kənd camaatının vəsaiti hesabına tikildiyini xatırladıb:

"Hər il sel gəlir körpünü belə bərbad vəziyyətə salır. Yeganə keçidimiz də buradandır. Təcili tibbi yardım (TTY) çağırırıq gəlmir. Gələndə də o tayda qalır. Təhlükəli olduğundan bu tərəfə keçə bilmir. Taksi ilə ancaq körpünün başına qədər gəlirik. Piyadalar avtomobil körpüyə çıxanda gözləməli olur, avtomobil də körpüdə piyada gördükdə gözləmək məcburiyyətində qalır. Belə dar körpüdən bir-birini gözləyərək qorxa-qorxa gedib-gəlirik".

O, aidiyyəti qurumlardan tezliklə bu vacib və çox aktual olan problemin həllinə ciddi reaksiya vermələrini xahiş edib.

Hər gün bu qəzalı vəziyyətdə olan körpüdən keçib Məşədilər kənd tam orta məktəbinə dərs deməyə gedən Rasim Süleymanov da öz narazılığını dilə gətirib:

"Mən uzun müddətdir bu kənddə müəllim işləyirəm. Gəldiyim vaxtdan etibarən gördüyüm bu, dəmir körpüdür. Kəndin giriş-çıxışını təmin edən əsas bu körpüdür. Körpü əvvəl nisbətən saz vəziyyətdə idi. Son vaxtlar körpü, demək olar ki, bərbad vəziyyətə düşüb. Xüsusən bu yay selin gəlişi ilə əlaqədar olaraq körpüdə çox qəzalı bir vəziyyət yaranıb. Gediş-gəliş də çətinlik yaradır. Rayon mərkəzindən taksi ilə gəldikdə sürücü körpüdən keçmək üçün əlavə qiymət istəyir.

Problemlə əlaqədar Tovuz Rayon İcra Hakimiyyətindən bildirilib ki, Məşədilər kəndini rayon mərkəzi ilə birləşdirən Zəyəmçay üzərində salınmış metal körpü ötən əsrin 80-ci illərində qurulub.

Yaz yağışları zamanı gələn sel suları körpünün bir hissəsini dağıdıb. Bununla bağlı Azərbaycan Avtomobil Yolları Dövlət Agentliyinə (AAYDA) müraciət edilib. Qurum əməkdaşlarının iştirakı ilə körpüyə baxış keçirilib, lazım olan tədbirlərin icrası üçün akt tərtib olunub.

Məsələ ilə bağlı AAYDA-nın mətbuat katibi Anar Nəcəfli sözügedən körpünün qurumun balansında olmadığını və agentliyin bununla bağlı hər hansı cavabdehlik daşımadığını qeyd edib:

"Tovuz Rayon İcra Hakimiyyətindən Məşədilər kəndində olan körpü ilə bağlı AAYDA-ya müraciət olunduğu üçün əməkdaşlarımız tərəfindən həmin körpüyə baxış keçirilib. Yeni körpünün layihələndirilməsi ilə bağlı təkliflər hazırlanaraq aidiyyəti üzrə təqdim olunub. Əgər layihə qəbul olunarsa, yeni körpünün tikintisi üçün vəsait ayrılarsa, agentlik tərəfindən həmin ərazidə yeni körpünün tikintisi həyata keçirilə bilər".