Ötən gün Ucar rayonunda elektrik enerjisinin verilməsində fasilələr yaranıb.
Bununla bağlı Oxu.Az-a müraciət daxil olub.
Qeyd olunub ki, fasilələr həm rayon mərkəzi, həm də ətraf yaşayış məntəqələrində müşahidə olunub.
Oxu.Az-ın sorğusuna cavab olaraq "Azərişıq" ASC-dən bildirilib ki, elektrik enerjisinin verilməsində yaranan fasilə hava şəraiti ilə əlaqədar olub.
"Ötən gecə əsən güclü külək və fırtına Ucar Elektrik Şəbəkəsinin bəzi ərazilərində elektrik enerjisinin verilişində qısamüddətli fasilələrin yaranmasına yol açıb. Buna səbəb güclü küləyin əsməsi nəticəsində ağac budaqlarının, eləcə də bəzi ərazilərdə küləyin şiddətindən asılı olaraq ağacların gövdələrindən qırılaraq elektrik xətlərinin üzərinə aşması olub. "Azərişıq" ASC-nin qəza briqadaları, eləcə də yerli idarələrin əməkdaşları hadisə yerlərində operativ təmir-bərpa işləri həyata keçiriblər. Qısa vaxtda elektrik enerjisinin verilişində yaranan fasilələr aradan qaldırılıb", - deyə məlumatda bildirilib.
